Teatr ujymy Ulttyq kitap kúni qarsańynda almatylyq kórermen nazaryna «Orman ǵajaıyptary» ertegisiniń premerasyn usyndy. Qoıylym álemge áıgili nemis jazýshysy Otfrıd Proıslerdiń balalar ádebıetiniń jaýhary sanalatyn «Kishkentaı sıqyrshy» povesiniń jelisimen sahnalandy.
Balalar ádebıetiniń altyn qorynan oryn alǵan bul shyǵarma – jaqsylyq pen zulymdyq, batyldyq pen meıirim, adaldyq pen izgilik taqyryptaryn qozǵaıtyn oıly týyndy. Spektákldiń rejıseri – elimizdegi qýyrshaq teatr rejıssýrasynyń damýyna súbeli úles qosyp júrgen, erekshe darynymen tanylǵan talantty óner ıesi Anton Zaısev.
– Bul – qalyptasqan arhetıpterdi jeńip, sanaly túrde jaqsylyqty tańdaǵan kishkentaı qyz jaıly oqıǵa. Búkil álem seni jamandyqqa ıtermeleıdi, al sen bolsań, kishkentaı ǵana adam bola tura, jaqsylyqty tańdaısyń. Balaǵa osyny aıtyp, oǵan tipti ózi de nadandyqqa, ádiletsiz kórinetin dúnıelerge qarsy tura alatynyn, sonymen qatar meıirimdi bolyp, jaqsy ister jasaı alatynyn kórsetý – men úshin shyn máninde úlken is, – deıdi Anton Zaısev.
Spektákldiń sahnalyq sýretshisi – Aqtóbe oblystyq qýyrshaq teatrynyń dırektory, Qazaqstannyń mádenıet qaıratkeri, halyqaralyq jáne respýblıkalyq qýyrshaq teatrlary festıválderiniń birneshe márte «Úzdik sýretshi» nomınasıasy boıynsha jeńimpazy Ásıa Qurmanalına boldy. Jańa qoıylymda 20-ǵa jýyq túrli qýyrshaq túri qoldanyldy. Al sahna keńistigi qupıaǵa toly kitaphana atmosferasyn beıneleıtin qoıý ári tereń reńktermen kómkerildi.
- Ulttyq kitap kúni – rýhanı baılyqqa bas ıetin, ádebıettiń qudiretin dáripteıtin erekshe kún. Memlekettik qýyrshaq teatry bul merekeni kitap pen teatr arasyndaǵy altyn kópirdi jalǵaý arqyly atap ótýdi jón kórdi. Qoıylym barysyn tamashalaı otyryp, kórermen tek ertegi álemine sapar shekpeıdi – ol kitaptyń shynaıy qundylyǵyn, paraq arasyndaǵy ǵajaıyp ómirdi sezinedi. Qoıylymnyń túpki maqsaty – jas kórermenge kitaptyń sıqyrly kúshin sezindirý, olardy oqýǵa baýlý. Bul – óte mańyzdy tárbıe. Óıtkeni, qazirgi sandyq zamanda kitaptyń rýhanı mańyzyn bala boıyna sińirý ońaı sharýa emes, – dedi Memlekettik qýyrshaq teatrynyń dırektory Almat Amangeldi.