Almatyda «Balqash kóli ekojúıesin saqtaý boıynsha master-jospar ázirleý» taqyrybynda eki kúndik semınar ótýde.
Jıynda Sý resýrstary jáne ırrıgasıa mınıstrliginiń Aqparattyq-taldaý ortalyǵy qujatty daıyndaýǵa arnalǵan Jol kartasyn tanystyrdy, dep habarlaıdy aqshamnews.kz.
Jol kartasynda İle-Balqash baseıniniń jer ústi jáne jer asty sý resýrstarynyń jaı-kúıi men sapasyn keshendi túrde zertteý, Balqash kóliniń deńgeıin baqylaýǵa arnalǵan sıfrlyq platforma qurý, sý nysandaryn avtomattandyrý jáne sıfrlandyrý, sondaı-aq basym gıdrotehnıkalyq qurylystardy damytý sharalary qarastyrylǵan.
Budan bólek, İle-Balqash baseıniniń sý resýrstaryn utymdy jáne tıimdi paıdalaný boıynsha sharalar, sondaı-aq QHR-men birlesip sý qorǵaý jáne turaqty paıdalaný máseleleri boıynsha is-sharalar ázirlengen.
Balqash kóliniń baseıni boıynsha zertteý jumystary Fransıanyń Damý agenttigi (AFD), Fransıanyń Geologıalyq jáne taý-ken zertteýler búrosy (BRGM) jáne qazaqstandyq mamandarmen birlesip júrgiziledi. Qazirgi ýaqytta fransýz tarapy qajetti málimetterdi jınaý ústinde. Atap aıtqanda, BRGM sarapshylary Balqash baseınindegi uńǵymalardy, gıdrobeketterdi jáne sýarmaly jerlerdi aralap, dalalyq zertteý jumystaryn júrgizýdi josparlap otyr.
Almatyda ótip jatqan semınardy Sý resýrstary jáne ırrıgasıa mınıstrligi «Qazaqmys korporasıasy» JSHS-niń qoldaýymen uıymdastyrdy. İs-sharaǵa mınıstrlik pen basqa da memlekettik organdardyń ókilderi, halyqaralyq uıymdar men Fransıanyń Almatydaǵy Bas konsýldyǵynyń ókilderi, sondaı-aq ǵalymdar men sarapshylar qatysyp jatyr.
Balqash kóline qatysty máseleler uzaq ýaqyt boıy júıesiz, bólek-bólek sheshilip keldi. Endi osy saladaǵy jumystardy júıeli jáne kelisilgen deńgeıge kóshirý úshin Balqash kólin saqtaý men qorǵaý jónindegi master-jospar ázirleýdi bastadyq. Bul qujat baseınniń sý resýrstaryn basqarýda tabıǵat, ekonomıka jáne qoǵam múddeleriniń tepe-teńdigine negizdelgen tutas, salaralyq tásildi qalyptastyrýda mańyzdy kezeń bolady. Master-jospardy ázirleý úshin sý, ekologıa, energetıka, aýyl sharýashylyǵy jáne İle-Balqash óńiriniń áleýmettik-ekonomıkalyq damýy syndy barlyq negizgi baǵyt boıynsha keshendi zertteý men taldaý qajet. Búgin usynylǵan Jol kartasy osy maqsatta daıyndaldy», – dedi Sý resýrstary jáne ırrıgasıa birinshi vıse-mınıstri Bolat Beknıaz.