Naýqasqa Almaty qalalyq №4 klınıkalyq aýrýhanasynda ota jasalǵan.
Almatylyq dárigerler denesiniń 80 paıyzyn kúıik shalǵan er adamdy ólimnen aman alyp qaldy, dep habarlaıdy Almaty-akshamy.kz.
Aýrýhanaǵa aýyr hálde jetkizilgen naýqas osydan 3 aı buryn aýladaǵy qudyqty jóndeý kezinde kıimine shoq túsip, tirideı órtenip kete jazdapty.
Ólim aýzynda jatqan naýqasqa Almaty qalalyq №4 klınıkalyq aýrýhanasynda ota jasalǵan. 29 jastaǵy Nursultan Sádýaqasovty aman alyp qalý úshin operasıaǵa reanımatolog, kombýstıolog, kardıolog jáne basqa da bilikti dárigerler qatysypty. Er adamnyń ońalýyna 80 kúndeı ýaqyt ketken.
«26 maýsymda aıaq asty úıde jóndeý jumystaryn jasap jatyp, órt tutanyp,kıim órtenip ketti. Denemdi kúıik shaldy», – dedi naýqas Nursultan Sádýaqasov.
Oqys oqıǵa 26 maýsym kúni Almaty oblysyndaǵy Uzynaǵash aýylynda bolǵan eken. Oıda-joqta azamat aýrýhananyń jan saqtaý bóliminen biraq shyqqan. Al dárigerlerdiń sózine sensek, mundaı jaraqat saldarynan adamnyń tiri qalýy ekitalaı.
«Naýqas aýrýhanaǵa aýyr hálde tústi. Denesiniń 80 paıyz kúıik shalǵan. Oǵan jansaqtaý bóliminde ota jasaldy. Keıin kúıgen jerlerine jasandy teri qaptadyq»,– dedi №4 qalalyq klınıkalyq aýrýhanasynyń bólim meńgerýshisi Nurjan Bıqońyrov.
Teri translpantasıasynan keıin jaranyń beti birtindep jazylyp ketýi tıis. Dárigerler Nursultannyń jaǵdaıy edáýir túzelgenin, stasıonarlyq emge zárý emes ekenin aıtty. Sondyqtan ol úıine qaıtyp, otbasymen qaýyshatyn sátti taǵatsyzdana kútip otyr.