Kóptegen áleýetti klıentter úı satyp alýdan bas tartty.
Ipoteka mólsherlemesi 2008 jyldan beri alǵash ret 6 paıyzǵa jetti, dep habarlaıdy Almaty-akshamy.kz QazAqparatqa silteme jasap.
Ipoteka mólsherlemesi ótken aptada 5,89%-dan 6,02%-ǵa kóterildi. Bul – ótken jylmen salystyrǵanda eki eseden astam joǵary – 2,86% ósip, 2008 jyldyń qarashasynda turǵyn úı naryǵynyń quldyraýy uly resessıany týdyrǵannan keıin tirkelgen eń joǵary kórsetkish.
Federaldy rezervtik júıeniń ınflásıany tejeýge baǵyttalǵan agressıvti sharalarynyń nátıjesinde paıyzdyq mólsherlemelerdiń kóterilýi turǵyn úı naryǵyn tejedi. Kóptegen áleýetti klıentter úı satyp alýdan bas tartty, óıtkeni joǵary mólsherlemeler aı saıynǵy ıpotekalyq tólemderdi júzdegen dollarǵa kóbeıtken. Ulttyq rıeltorlar qaýymdastyǵynyń málimetinshe, AQSH-taǵy úılerdiń satylym kórsetkishi qatarynan alty aı boıy tómendep keledi.
Úılerin qaıta qarjylandyrǵysy keletinder arasynda suranysqa ıe 15 jylǵa belgilengen ıpoteka boıynsha ortasha mólsherleme ótken aptada 5,16%-dan 5,21%-ǵa deıin ósti. Ótken jyly bul kórsetkish 2,19 paıyz boldy.
Úkimet AQSH-tyń ekonomıkalyq kórsetkishteri sáýir-maýsym aralyǵynda jylyna 0,6%-ǵa tómendegenin, bul – ekonomıkanyń ekinshi toqsan qatarynan quldyraýy jáne resessıanyń beıresmı belgisi ekenin málimdedi.
Degenmen, ekonomıserdiń kópshiligi AQSH-ta eńbek naryǵynyń turaqty bolyp qalýyn eskere otyryp, ekonomıkanyń resessıada nemese resessıa aldynda turǵanyna kúmándanatynyn aıtty.