Qala ákimi áleýmettik kómek úshin árbir tıyndy jalpy qaladan jınaıtynyn aıtty.
Almaty ákimi búgin qala kásipkerlerimen kezdesti. Onyń barysynda qala ákimine suraqtar men ótinishter de tústi, dep habarlaıdy Almaty-akshamy.kz.
«Bazarlar ózderiniń janyndaǵy avtoturaq máselesi boıynsha memleketke birneshe ret júgingen. Avtoturaq jumysy qalaı uıymdastyrylady? Jeke menshik ıesi men jalǵyz operatordyń aıyrmashylyǵy nede? Avtoturaq úshin salyqtar men basqa da aýdarymdardy tóleýde deldaldar bolmaýyn suraımyz. Sondaı-aq, avtoturaqtardy bazar jalǵa alýshylaryna berýdi qarastyrsańyz», - degen ótinish tústi.
«Jaqynda «Alan Parkıng» JSHS men «Almaty Spestehparkıng Servıs» JSHS aktıvterin komýnaldyq menshikke qabyldaýdy aıaqtadyq. 100% komýnaldyq kásiporyn bolady, bir operatordan túsken barlyq kiris jergilikti búdjetke túsedi, deldal bolmaıdy», - deıdi Almaty qalasynyń ákimi Erbolat Dosaev.
Memlekettik kirister departamentiniń málimetinshe, ótken jyly 56 bazar qala búdjetine 1,8 mlrd teńge, bıylǵy 8 aıda 2 mlrd teńge tólegen. Qaladaǵy 56 bazardyń aınalymy 2 jyldyq qalalyq búdjetke teń jáne shamamen 2 trıllıon teńgege baǵalanady.
«Sondyqtan, maǵan avtoturaqtar bazarlarǵa, ásirese Soltústik aınalym ornalasqan jerlerge jyljytý kerek dese, men munymen kelispeımin. Avtoturaqtar komýnaldyq menshikte qalady. Búkil álemde ádettegideı, avtoturaqtar aktıvi qala ákimshiligine tıesili bolady.
Aqyly avtoturaqtardan túsken tabys azamattardyń áleýmettik qajettilikterine jumsalady. Jańa qubyrlar, ınjenerlik jeliler, mektepter men emhanalar, munyń bári jergilikti búdjet esebinen salynady. Áleýmettik qajettilikter úshin búkil qaladan árbir tıyndy jınaımyn», - dedi qala ákimi Erbolat Dosaev.