Kúrdeli ota 3 saǵatta aıaqtaldy.
Almatylyq dárigerler kóligin jóndeý barysynda oń kózine metal synyǵy túsken 62 jastaǵy er azamattyń janaryn saqtap qaldy, dep habarlaıdy Almaty-akshamy.kz
Ortalyq qalalyq klınıkalyq aýrýhana dárigerleri mindetti áleýmettik medısınalyq saqtandyrý esebinen kózge joǵary tehnologıalyq operasıalar jasaıdy. Bıyl jyl basynan beri oftalmologıa bólimshesinde 450-ge jýyq operasıa jasalypty.
"Metal synyǵy kózdiń barlyq qabatynan ótip, kóz orbıtasynyń ishine, janardyń júıke tamyrlary ornalasqan tusyna qadalǵan. Ota barysynda metal alynyp, jaraqattyń saldarynan bolatyn menıngıt pen sepsıstiń aldyn aldyq. Kúrdeli ota 3 saǵatta aıaqtaldy. Jalpy mundaı ota asqan sheberlikti, zergerge tán dáldikti talap etedi. Óıtkeni operasıa barysynda kózdegi shynyáınektiń pishinine tıtteı de zaqym kelmeýi tıis", - deıdi oftalmologıa bólimshesiniń meńgerýshisi Gúlzat Ábdiraıymova.
Joǵary tehnologıalar men bilikti mamandar pasıenttiń kóz janaryn saqtap qaldy. Qazir emdelýshiniń jaǵdaıy jaqsy, kórý qabileti qalpyna keldi. Biraq ol aldaǵy ýaqytta kóz dárigerleriniń baqylaýynda bolýy kerek.