Jyl basynan beri dárigerler 132 ota jasady
Almaty balalar jedel medısınalyq kómek kórsetý ortalyǵynyń oftalmologıa bólimshesinde qıtarlanǵan úılesken qylılyq, shashyrandy úılesken qylılyq, tik qylılyq dıagnozy bar balalardy emdeıdi, dep habarlaıdy Almaty-akshamy.kz Almaty.tv-ge silteme jasap.
Balalarda kórý qabiletiniń buzylýy týa bitken jáne gadjetterge degen sheksiz qumarlyqtyń nátıjesinde paıda bolady. Qylılyqty emdeýge bolady. Biraq dárigerler emdeýdi uzaq ýaqytqa keıinge qaldyrmaýǵa keńes beredi. Balalar jedel járdem ortalyǵynda kórý qabiletin túzetýge múmkindik beretin trenajerlar - Sınoptofor jáne Makýlotester kómegimen hırýrgıalyq emes emdeý ádisteri qoldanylady. Kóp jaǵdaıda oftalmologtar qylılyqty hırýrgıalyq aralasýsyz konservatıvti túrde emdeıdi.
«Qylılyqty emdeý kezinde bizdiń maqsatymyz aqaýdy kosmetıkalyq joıý ǵana emes, sondaı-aq eń joǵary kórý fýnksıasyn damytýǵa jaǵdaı jasaý - bul bınokýlárlyq (qorshaǵan ortany eki kózben qabyldaý qabileti), stereoskopıalyq kórý.
Ári qaraı emdeý taktıkasyn sheshý úshin balany múmkindiginshe erterek oftalmologqa kórsetken jón. Kórý analızatorynyń joǵary sapaly tolyqqandy damýyna jaǵdaı jasaý úshin qylılyqty emdeý qashanda der kezinde júrgizilýi kerek. Bul óte mańyzdy! Ókinishke qaraı, 7-8 jastan keıin balalardy emdegende, biz tek kórý ótkirligin saqtaýdy maqsat etemiz, óıtkeni bul ómir sapasynyń mańyzdy faktory bolyp tabylady, biraq bul kezde bınokýlárlyq kórýdiń tolyq damýy týraly sóz qozǵamaımyz. Sondyqtan emdelýge jasy úlkenirek balalar kelgende, jaqsy jáne tıimdi nátıjeniń bolýy ekitalaı. Mundaı balalardy 7 jasqa deıin, ıaǵnı mektepke deıin baqylap, emdeýge tyrysyńyz. Bınokýlárlyq buzylýmen baılanysty qandaı da bir jaǵdaıdy túzetý mektep júktemesiniń bolýyna baılanysty belgili bir qıyndyq týdyrady. Otasyz emdeýge bolatyn qylılyqtyń kóptegen túri bar, sondyqtan hırýrgıa - dáriger sheshetin másele.
Kózildirikti tańdaý, aparattyq emdeý aıasynda hırýrgıasyz tıimdi emdeletin qylılyq túrleri bar», - dep túsindiredi Almaty qalalyq Balalar jedel medısınalyq járdem ortalyǵynyń oftalmology, joǵary sanatty dáriger, medısına ǵylymdarynyń kandıdaty, Dúnıejúzilik balalar oftalmologtary qaýymdastyǵynyń múshesi Lázzat Keıkına.
Qylılyqtyń sebebi kóp. Qylılyqty qozdyratyn kózdiń kórinisterimen qatar nevrologıalyq jaǵdaılar bolýy múmkin, sondyqtan Ortalyqtyń oftalmologtary qashanda nevropatolog áriptesterimen birge jumys isteıdi. Qalypty kórý omyrtqanyń qurylymyna tikeleı baılanysty ekenin atap ótken jón, al qylılyq balalar omyrtqany durys ustamaýdyń sebebi bolyp tabylady.
«Qylılyq omyrtqanyń qurylymyna qatty áser etedi. Basty májbúrli tómen qarap ustaý onyń kúıine ǵana emes, jalpy omyrtqanyń qurylymyna tolyǵymen áser etedi. Sondyqtan, biz qylılyqty neǵurlym erterek emdesek, náresteniń basty ustaýyn qalpyna keltirý ońaıyraq bolady. Sáıkesinshe, omyrtqanyń jaǵdaıy da jaqsarady. Kóbinese «kózdik qısyq moıyndy» shynaıy qısyq moıynmen shatastyrady, kóptegen osteopattar kózdi emdeý kerek ekenin umytyp, keıde ony sátsiz emdep te jatady», - dep qosty Lázzat Keıkına.
2022 jyldyń basynan Almaty Balalar shuǵyl medısınalyq kómek kórsetý ortalyǵynyń oftalmologıa bóliminde qylılyq dıagnozy boıynsha 147 bala emdeldi. Ótken 2021 jyly 109 naýqas emdeldi. Keıbir jaǵdaıda qylılyqty túzetý tek hırýrgıalyq ádispen iske asyrylady. Jyl basynan beri dárigerler 132 ota jasady (2021 jyly 99 ota jasaldy).