Almaty qalasynyń jedel ýákilderi qoǵamdyq kólikte jolaýshylardyń qaltasyn ańdyǵan urylardy quryqtady.
Ustalǵan kúdiktiler jolaýshylardyń uıaly telefondary men baǵaly zattaryn urlap kelgen, dep habarlaıdy aqshamnews.kz Polisia.kz-ke silteme jasap.
— Kúdiktilerdiń biri – 47 jasta, al ekinshisi – 26 jasta. Ekeýi de osyǵan deıin birneshe ret qylmystyq jaýapkershilikke tartylǵan, ıaǵnı tájirıbeli urylar. Qazirgi ýaqytta olar qamaýda. Tergeý barysynda olardyń ózge qylmystarǵa qatysy bar-joǵy tekserilip jatyr, — dedi Almaty qalalyq PD krımınaldyq polısıa basqarmasynyń bastyǵy Talant Isaev.
Polıseıler azamattarǵa múliktik qaýipsizdik sharalaryn umytpaý qajettigin taǵy da eskertedi. Adamdar kóp jınalatyn oryndarda baǵaly zattaryńyzǵa muqıat bolyńyz, ásirese gadjetterińizdi kózden tasa etpeńiz. Eger urlyqtyń kýási nemese qurbany bolsańyz, dereý polısıaǵa habarlasyńyz.