Almaty Qalalyq jedel shuǵyl kómek kórsetý aýrýhanasynyń (QJSHKKA) travmatolog-ortopedteri jambas súıegi synǵan 90 jastaǵy keıýanaǵa jambas býynyn endoprotezdeý otasyn sátti jasady.
Naýqas ómirinde ekinshi ret júrýdi úırendi dep aıta alamyz. Eger erte balalyq shaqta bul tabıǵı qubylys bolsa, bul joly ońaı bolǵan joq. Kásibı bilikti dárigerler men joǵary tehnologıalar arqasynda bári sátti ótti, dep habarlaıdy Almaty-akshamy.kz.
Tamara Grıgorevna QJSHKKA qabyldaý bólimine jedel járdem brıgadasymen shuǵyl túrde jetkizildi. Naýqas oń jambas býyny aımaǵyndaǵy qatty aýyrsynýǵa jáne oń aıaqtyń tirek qabiletiniń buzylýyna shaǵymdandy. Oǵan oń san súıegi moıyn bóliginiń fragmentteriniń yǵysýymen jabyq bazaldy synyq dıagnozy qoıyldy.
Naýqastyń jasy men jaǵdaıyn eskere otyryp, qosymsha tekserý jáne aldyn ala daıyndyqtan keıin múmkindiginshe tez áreket etý qajet boldy, sondyqtan naýqas dereý hırýrgıalyq emdeýge jiberildi.
Oń jambas býynyn bıpolárly sementtik endoprotezdeý otasyn №2 travmatologıa jáne ortopedıa bólimshesiniń meńgerýshisi Medet Janysov, travmatologtar Jánibek Jumabek, Begzod Hanseıitov, anestezıolog Gúlnar Kamalova jasady.
Operasıa 30 mınýtqa sozyldy.
– Mundaı jaǵdaıda naýqas múmkindiginshe az jatqany mańyzdy. Egde jasta, ókinishke qaraı, kóptegen sozylmaly aýrýlar jınalyp qalady, onyń ústine jazylýy baıaý ınfeksıalar qosylady. Sondyqtan mundaı naýqastar úshin endoprotezdeý óte mańyzdy, - dep atap ótti bólimshe meńgerýshisi Medet Janysov.
Egde jastaǵy pasıentter úshin tolyq protezdeý qaýipti, al osteosıntezdiń paıdasy joq. Al jambasty bıpolárly endoprotezdeý negizinen álsiregen jáne egde jastaǵy naýqastarǵa arnalǵan. Bıpolárly endoprotezdeý pasıentti tolyqqandy, belsendi ómirge múmkindiginshe qysqa merzimde jáne meılinshe az táýekelmen qaıtarý úshin qoldanylady.
Jambasty bıpolárly endoprotezdeý otasy tolyq endoprotezdeýge (eki saǵattan astam) qaraǵanda, birneshe ese jyldamyraq jasalady (shamamen jarty saǵat) jáne jalpy anestezıamen de, jergilikti anestezıamen de oryndalýy múmkin.
• Tolyq endoprotezdeýge qaraǵanda, bıpolárly endoprotezdeý az jaraqatty ári áldeqaıda az energıany qajet etedi. Tolyq endoprotezdeý kezinde árqashan gemotransfýzıa júzege asyrylady, bul egde jastaǵy jáne sozylmaly aýrýy bar naýqastar úshin qolaısyz.
• Operasıadan keıingi kezeń meılinshe az ýaqytty alady. Al osteosıntezden keıingi qalpyna keltirý jáne operasıadan keıingi gıpodınamıa aılarǵa sozylady.
Operasıa jasalǵan soń, 3 kúnnen keıin Tamara Grıgorevna ornynan turyp, palatada júre bastady. Aýrýhanadan 9-kúni shyǵarylǵan kezde ol bólim dálizimen júris arbasymen óz betinshe qozǵaldy. Dárigerler bári jaqsy bolatynyna senimdi. Eń bastysy, ol óz qutqarýshylarynyń usynystaryn buljytpaı jaýapkershilikpen oryndaıdy, bul óte mańyzdy.
Tamara Grıgorevna aýrýhana dárigerleri men medbıkelerine sheksiz alǵysyn bildirdi.