Mamandar óz keńesin berdi.
Almatyda 6 kópsalaly qalalyq emhanada travmatologıalyq pýnktter bar. Olardyń árqaısysynda dárigerler tek synyq jaraqatyn alǵan kezde ǵana emes, úsik shalý, kóshe jáne sport jaraqaty bolsa, jol-kólik oqıǵasy saldarynan bolǵan jaraqattar kezinde kómek kórsetýge daıyn. Almaty qalalyq qoǵamdyq densaýlyq saqtaý basqarmasynyń shtattan tys travmatology Qanat Tezekbaev ÓKQ-de ótken brıfıńte maýsymaralyq kezeńde jáne qys mezgilinde jaraqattanýdan qalaı saqtaný kerektigi týraly aıtty, dep habarlaıdy Almaty-akshamy.kz .
Travmotologıalyq pýnktter No4 qalalyq klınıkalyq aýrýhana, No7 qalalyq klınıkalyq aýrýhana, Qalalyq jedel shuǵyl kómek kórsetý aýrýhanasy, Ortalyq klınıkalyq aýrýhana, Balalar shuǵyl medısınalyq járdem ortalyǵynda ornalasqan. Olar medısınalyq kómektiń kepildik berilgen kólemi aıasynda táýlik boıy kómek kórsetedi.
Qanat Tezekbaev atap ótkendeı, kún sýytqaly beri kómek surap, shaǵym aıtyp kelgender qatarynyń kóbeıýi nemese azaıýy baıqalmaıdy. Ol jaqynda bolǵan mysaldardyń birin keltirdi, turaqty turǵylyqty jeri joq er adamnyń eki aıaǵyn İİ dárejeli úsik shalyp, No4 qalalyq klınıkalyq aýrýhanaǵa jatqyzyldy. Dárigerler oǵan bilikti kómek kórsetti, sonyń arqasynda aıaq-qoldaryn aman saqtaý múmkin boldy, ampýtasıa qajet bolmady.
Almatylyq travmatologtar jyl basynan beri barlyǵy 17 183 naýqasty emdegen. Kóbinese medısınalyq kómekke júgingender - kóshede alǵan jaraqattaryna baılanysty kómek surap kelgen turǵyndar emdeldi. Bul rette turmystyq jáne jol-kólik oqıǵalaryndaǵy ólim-jitimniń tıisinshe 0,83% jáne 1,4%-ǵa tómendeýiniń oń dınamıkasy baıqalady.
Dáriger qys mezgilindegi oıyn-saýyq pen kóńil kóterý kezinde bolyp jatatyn qaýipsizdik týraly eske saldy, óıtkeni olar kóbinese jaraqat alýmen aıaqtalyp jatady.
«Taýda shańǵy maýsymynyń ashylýymen jáne kóktaıǵaqtardyń bastalýymen biz sport jáne kóshe jaraqattarynyń kóbeıetinin bilemiz. Kóbinese naýqastar tobyq býynynyń jaraqattary, sozylýy, jyrtylýy, bilezik býynynyń synýy shaǵymdarymen jıi keledi. Qysta bolatyn taǵy bir qaýip – úsik shalý», - deıdi dáriger.
Qysqy sportpen shuǵyldanǵaly júrgen azamattardyń óz múmkindikterin ólshep, jyldamdyqty eskerýi óte mańyzdy.
Almaty qalalyq Qoǵamdyq densaýlyq saqtaý basqarmasynyń shtattan tys travmatology Qanat Tezekbaev megapolıs turǵyndaryna qysta, ásirese kóktaıǵaq kezinde: maýsymǵa saı yńǵaıly aıaq kıim kıýge, qala qyzmeti óńdegen qum sebilgen jaıaý júrginshiler jolymen júrýge keńes beredi.
«Ashyq dalada serýendeýdi unatatyndar úshin shańǵy trassalary men muz aıdyndarynda nusqaýshylardyń erejelerin saqtaýdy, sondaı-aq taýdan túsý kezinde óz múmkindikterińizdi ólsheýdi suraımyz. Jaraqat alǵan jaǵdaıda der kezinde medısınalyq mekemelerge júginińizder», - dep túıindedi dáriger.