Almatyda oqýshy oryndarynyń tapshylyǵyn joıý jáne bilim berý ınfraqurylymyn jaqsartý belsendi túrde sheshilýde – Erbolat Dosaev
Almaty ákimi Erbolat Dosaev Ortalyq komýnıkasıalar qyzmetinde ótken kóshpeli brıfıńte qalanyń bilim berý ınfraqurylymyn damytý máselelerin baıandady, - dep habarlaıdy aqshamnews.kz
Bıyl Almatyda 18 bilim berý nysany salynyp, 11,7 myń oqýshy orny qamtamasyz etildi. Osy sharalardyń arqasynda kelesi oqý jylyna qaraı oryn tapshylyǵy «basqarylatyn» deńgeıge – 3-4 myń orynǵa deıin qysqarady.
Bilim berýdi damytýdyń mańyzdy bóligi «Almaty mektepteri» standartyn engizý. Bul joba aıasynda memlekettik mektep oqýshylaryn tasymaldaý uıymdastyryldy. 2024 jyly mektep avtobýstarynyń sany 200-ge jetkizildi, bul 15,3 myń oqýshyny qamtýǵa múmkindik berdi. 2025 jyly avtobýs sany taǵy 100-ge kóbeıtiledi, bul oqýshylarǵa mektepke qaýipsiz ári yńǵaıly túrde barýǵa jaǵdaı jasaıdy.
Qala ákimi Erbolat Dosaev bilim berý ınfraqurylymyn damytý sapaly jáne qoljetimdi bilim alý sharttaryn qamtamasyz etýge baǵyttalǵanyn atap ótti.
Jalpy, Almatyda oqýshy oryndarynyń tapshylyǵyn azaıtý boıynsha júıeli jumystar júrgizilýde. Bul jańa mektepter salý, jergilikti búdjet esebinen qosymsha ǵımarattar salý arqyly júzege asýda.