Almatyda 22 jastaǵy jigit tanysynan jarty mıllıon teńge bopsalaǵan.
Aqshany alý úshin azamat qarýmen qorqytyp, sendirý úshin odan oq atqan, dep habarlaıdy Almaty-akshamy.kz Polisia.kz-ke silteme jasap.
«Jaqynda bizge 23 jastaǵy jergilikti turǵyn aryzben kelip, ózin qamqor jigit retinde kórsetken jańa tanysy qyzdyń úıine kelip, travmatıkalyq tapanshamen qorqytyp, 500 myń teńge talap etip, bopsalaǵan. Áıtpese ony jáne sińlisin ońdyrmaıtynyna ýáde bergen. Qyz ondaı aqshanyń joqtyǵyn aıtqan. Sol kezde azamat ony telefonyn lombardqa ótkizýge májbúrlegen. Qarsylyqqa jaýap retinde ol páterdiń edenine bir ret oq atqan. T.esimdi azamat qoryqqannan tanysynyń talaptaryn oryndap, oǵan lombard bergen 235 myń teńgeni tabystaǵan. Boıjetken 2,5 aptadan keıin polısıaǵa kómek surap júgingen. Keshe keshke kúdikti EQkB-daǵy áriptesteri men patrúldik polısıa qyzmetkerleriniń kómegimen ustaldy. Onyń qasynda birneshe er adam bolǵan, olardyń jeke basynyń zańsyz áreketterge qatysy bar-joǵy mindetti túrde tekseriletin bolady», – dedi Naýryzbaı aýdandyq polısıa basqarmasynyń bastyǵy Dıdar Jaqypbaev.
Kúdikti 22 jastaǵy A.esimdi azamattyń áreketi QR QK-niń 194 baby (Bopsalaý) boıynsha saralanǵan. Ol PD ýaqytsha ustaý ızolátoryna qamaldy.
QR QK-niń 201 babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77 baby 3-bólimi, 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.