Almatyda general-maıor Amankeldi Mendalıevti eske alý maqsatynda Ulttyq ulannyń «Ońtústik» óńirlik qolbasshylyǵy óz ardagerleri arasynda skandınavıalyq júrýden jarys uıymdastyrdy.
Megapolıstiń Botanıkalyq baǵynda ótken jarysqa qatysýshylar 70 jasqa deıin jáne 70 jastan joǵary jastaǵy ardagerler bolyp eki topqa bólindi. Birinshi toptaǵy ardagerler 6 shaqyrymdyq qashyqtyqty, al ekinshi top 3 shaqyrymdyq qashyqtyqty baǵyndyrý kerek boldy.
5571 áskerı bóliminiń sport jáne dene shynyqtyrý bastyǵy aǵa leıtenant Davronbek Týrsýnovtyń pármen berýimen sórede turǵan ardager sportshylar dodany bastap ketti. Á degennen aqsaqalymyz Magamed Gamzatovıch toptyń aldyna túsip, jarysqa jaı kelmegenin baıqatty. Jarysqa qatysýshylar 1,5 shaqyrym qashyqtyqty baǵyndyrǵanda, Magamed aǵamyz toptan 150 metrdeı uzap ketti. Sóıtip jeńisti eshkimge bermedi. Ekinshi, úshinshi bolyp Soıýzjol Jumanov pen Erkesh Qulbaev kelse, Aman Aqylov tórtinshi orynǵa taban tiredi. Aıta ketetin jaıt, polkovnık Soıýzjol Jumanov 3 jáne 6 shaqyrymdyq qashyqtyqta da baq synady. Birinshisinde ekinshi oryn alsa, 6 shaqyrymdyq qashyqtyqta birinshi keldi. 6 shaqyrymdyq qashyqtyqta máre syzyǵyn ekinshi bolyp 3656 áskerı bólimi ardagerler keńesiniń tóraǵasy Saǵat Baıbaqtıev aıaqtasa, 5571 áskerı bólimi ardagerler keńesiniń tóraǵasy Berik Almaǵanbetov alǵashqy úshtikke ilikti.
Jeńimpazdar arasynda polkovnık Ismaıl Abızov «Sport adamy» nomınasıasynda úzdik dep tanylsa, polkovnık Murat Qaragýıshıev «Eń kóp júretin adam» nomınasıasyn jeńip aldy. Al polkovnık Magamed Maındýrov aqsaqalymyz «Skandınavıalyq júrýdiń akýlasy» atandy.
– Jarysqa ardager qyzdarymyz Galına Maındýrova men Aınakúl Qojymovanyń, Astana qalasynan arnaıy kelgen polkovnık Murat Qaragýıshıevtiń qatysýy da is-sharanyń kórigin qyzdyra tústi. Mundaı is-sharalar jastarǵa úlgi bolady. Ardagerlerimizdiń áli de tyń ekenin bildiredi. Buqaralyq sportty, salaýatty ómir saltyn osylaı nasıhattaı júrimiz kerek. Jarys sońynda marqum general-maıor Amankeldi Shaıhyulynyń basyna baryp, quran baǵyshtadyq, – deıdi «Ońtústik» óńirlik ardagerler keńesiniń tóraǵasy, zapastaǵy polkovnık Asatýlla Qulahmedov.