55 jastaǵy K.esimdi azamatsha alaıaqtar tobynyń qylmystyq jelisine túsip qaldy.
Belgili bolǵandaı, áıel adam bir aptadaı qylmyskerlerdiń talaptaryn oryndap kelgen. Ol olardyń óziniń jınaǵan aqshasyn qorǵaýǵa tyrysyp jatqanyna senimdi bolǵan, dep habarlaıdy Almaty-akshamy.kz Polisia.kz-ke silteme jasap.
«Qaskóıler 21 qazanda uıaly telefon arqyly jábirlenýshige qońyraý shalǵany anyqtaldy. Olardyń biri ózin bank qyzmetkerimin, ekinshisi polıseımin dep tanystyrdy. Ekeýi de onyń shotyna belgisiz bireýler shabýyl jasaǵanyn aıtyp, aqshany odan ári “qaýipsiz shotqa” salý úshin “bank mamanyna” tapsyryp, saqtaýdy usynǵan. Sodan keıin áıel adam, beıtanys adamǵa 74 707 AQSH dollar men 1,3 mln teńge bergen. Kelesi kúni K.esimdi azamatshaǵa taǵy da “bank qyzmetkerleri” telefon soǵyp, 2 mln teńge kóleminde nesıe alýǵa kóndirgen. Áıel qaskóılerdiń bul talabyn da oryndaǵan. Tek 1 qarashada ǵana alaıaqtardyń qurbany bolǵanyn túsinip, polısıaǵa júgingen», – dedi Medeý aýdandyq Polısıa basqarmasynyń bastyǵy Dáýren Ótebaev.
Atalǵan derek boıynsha QR QK-niń 190-baby 4-bóligi 2-tarmaǵy boıynsha qylmystyq is tirkeldi. Tergeý-jedel toby quryldy.
«Qabyldanǵan sharalar nátıjesinde úsh adam anyqtalyp, ustaldy. Olar 24 jastaǵy S.esimdi azamat, 26 jastaǵy A.esimdi azamat jáne 27 jastaǵy S.esimdi RF azamaty. Kúdiktilerdiń jalǵa alǵan keńsesinde 20 uıaly telefon nómiri jáne ártúrli ekinshi deńgeıli bankterde ashylǵan 52 bank kartasy tabylyp, tárkilendi. Jaýap alý kezinde ustalǵan adamdar qarajatty qolma-qol aqshaǵa aınaldyrýmen, krıptovalútaǵa aıyrbastaýmen aınalysatyndaryn, bul isten óz paıdasyn alatyndaryn moıyndady. Qazirgi ýaqytta qylmystyń basqa da sybaılastary, sondaı-aq basqa da yqtımal epızodtardy anyqtaý boıynsha jedel jáne arnaıy is-sharalar júrgizilýde. Kúdiktiler qamaýǵa alyndy», – dedi Ótebaev.
Sonymen qatar, Almaty qalasynyń prokýratýrasy osyǵan uqsas epızodtardy boldyrmaý úshin azamattardy saqtyq pen qyraǵylyqqa shaqyrady.