Nú-Iorkte qazaqı naqyshtaǵy birneshe meıramhana jumys istep tur.
Ol muhıttyń ar jaǵyndaǵy otandastarymyz eldiń dámin saǵynǵanda baratyn jer ǵana emes, amerıkalyqtardyń da súıikti orynyna aınalǵan, dep habarlaıdy Almaty-akshamy.kz 24.kz-ke silteme jasap.
Farıda Ǵabbasova osydan tórt jyl buryn baýyrymen «Aǵaıyndylar» degen shaǵyn dámhana bıznesin bastaıdy. Keıin kásibi keńeıip, Nú-Iorktegi eń baı aýdan sanalatyn Manhettanda qazaqy naqyshtaǵy eki meıramhana ashqan. Munda túski jáne keshki ýaqyttarda amerıkalyqtar jıi keledi. Olarǵa bizdiń qonaqjaılyq pen ulttyq taǵamdar unaıdy.
«Olarǵa eshqandaı qospasy joq, úıdegideı daıyndalǵan, erekshe tabıǵı tamaqtyń dámi unaıdy», - deıdi kásipker Farıda Ǵabbasova.
Qazaqtyń ulttyq taǵamdaryna ǵana tán dámin saqtaý úshin keıbir qospalar men maılardy Qazaqstannan aldyrady eken. Al amerıkalyqtar jylqy jemeıtindikten sıyr etinen shujyq jasaıdy.
«Amerıkada jylqy etine tyıym salynǵan. Biz de oǵan jaýapkershilikpen qaraımyz. Sondyqtan qazynyń orynyna sıyr etinen barynsha uqsatyp jasaýǵa týra keledi», - deıdi kásipker Farıda Ǵabbasova.
Osylaısha áıgili Ýoll-Strıttiń mańynda qazaqstandyqtar ashqan kásip órkendep keledi. Eń bastysy talmaı eńbek etý kerek deıdi. Megopolıstiń damýyna at salysyp jatqan jerlesterimiz týraly Nú-Iork meri Erık Adams ta adamdyǵyn aıtty. Respýblıka kúninde bizdiń baıraqty kóterip quttyqtaǵan qala meri bylaı dedi.
«Qalamyzdaǵy qazaq qaýymdastyǵy rýhanı baı, bıznesti damytyp jatqan, bilimniń mańyzdylyǵyn túsinetin, yntymaqtastyqtyń kúshine senetin azamattar»,- deıdi Nú-Iork qalasynyń meri Erık Adams.
Qazaqstan ǵana emes, Ortalyq Azıa elderiniń as-sýyn usynatyn meıramhanada qazir 30 adam jumys isteıdi. Álemniń qaı buryshyna barsań da kezigetin túrik asqanasy sıaqty, bizdiń de ulttyq taǵamdardy AQSH-tyń ózge shtattarynda tatyp kórýge bolady. Kásipker Tehas, Florıda jáne Kalıfornıany kózdep otyr.