Qazaqstan álemniń 180 elimen saýda jasaıdy.
Qasym-Jomart Toqaev eldegi ınflásıaǵa ne áser etip otyrǵanyn aıtty, dep habarlaıdy Almaty-akshamy.kz
«Bizdi sheteldik azyq-túlik ımportynyń joǵary deńgeıi alańdatady. Bul ınflásıanyń ósýine alyp keledi. Sarapshylar Qazaqstandaǵy ınflásıaǵa syrtqy faktorlar yqpal etetinin aıtyp otyr», - dedi prezıdent Qazaqstanda tirkelgen sheteldik dıplomatıalyq mısıa basshylarymen kezdesýde.
Toqaev Qazaqstan ashyq ekonomıka qaǵıdatyna berik bolyp qala beretinin atap ótti. Aıtýynsha, respýblıka álemniń 180 elimen saýda jasaıdy. Jahandyq ekonomıkalyq qıyndyqtarǵa qaramastan, eldiń shıkizattyq emes eksporty shamamen 40 paıyzǵa ósti.
«Biz aldaǵy ýaqytta da ınvestısıa tartý boıynsha Ortalyq Azıadaǵy kóshbasshylyq pozısıamyzdy nyǵaıta beremiz. Bıylǵy 6 aıda sheteldik seriktesterimiz elimizdiń ekonomıkasyna shamamen 15 mıllıard AQSH dollary kóleminde ınvestısıa quıdy. Bul byltyrǵy osy kezeńdegi kórsetkishpen salystyrǵanda 30 paıyzǵa kóp», - dedi prezıdent.
Aıtýynsha, Qazaqstan jyl saıyn 5 mln tonnadan astam bıdaı men 1,5 mln tonna un eksporttaıdy.
«Álemniń eń iri on astyq eksporttaýshy elder qataryna kiremiz. Qazaqstan – zyǵyr tuqymyn iri óndirýshilerdiń jáne maıly daqyl eksporttaýshylardyń biri. Bizdiń strategıalyq maqsatymyz – salanyń óndirisin 2,5 ese jáne eksportty 2 ese ulǵaıtý», - dep atap ótti memleket basshysy.