Atyraý oblysy Mahambet aýdany Beıbarys aýylynda ornalasqan Saryózek kanalynan 520 myńnan astam balyq shabaqtary qutqaryldy.
Esterińizge sala keteıik, kóktemgi sý tasqyny saldarynan Jaıyq ózeni arnasynan shyǵyp, ózen sýy tógilgen jerler arqyly Saryózek arnasyna túsken bolatyn. Tasqyn sýlarmen birge arnaǵa balyq shabaqtary túsken. Maýsym aıynda Jaıyq ózenindegi sý deńgeıi turaqtandy, al tasqyn sý tógilip arnada ósken balyq shabaqtarymen birge jınalyp qalǵan.
Qazirgi ýaqytta arnada jınalǵan balyq shabaqtaryn saqtap qalý úshin sý berý nasosy arqyly sý jiberilýde jáne balyq shabaqtaryn qutqarý jumystary jalǵasýda, dep habarlaıdy aqshamnews.kz ASHM saıtyna silteme jasap.
İs-sharaǵa Jaıyq-Kaspıı oblysaralyq baseındik balyq sharýashylyǵy ınspeksıasy, jergilikti atqarýshy organdar, balyq sharýashylyǵy sýbektileriniń ókilderi, jergilikti turǵyndar, eriktiler jáne blogerler qatysýda.
Qutqarylǵan balyq shabaqtarynyń túrleri: sazan, taban, kókserke, jaıyn, móńke, ortasha salmaǵy 12-14 gram.
Aıta keteıik, 2024 jyldyń maýsymynan bastap qazirgi ýaqytqa deıin Atyraý oblysynyń sý aıdyndarynda 49 mln. 920 myńnan astam balyq shabaqtary, onyń ishinde Qurmanǵazy aýdanynyń aýmaǵynda – 39 mln. 900 myń dana, Inder aýdanynyń aýmaǵynda – 8 mln. 500 myń dana, Mahambet aýdanynda – 1 mln. 520 myń dana, Atyraý qalasynyń oblys ortalyǵynda - 35,5 myń dana balyq shabaqtary qutqaryldy.
Bólshektengen sý aıdyndarynan qutqarylǵan barlyq balyq shabaqtary Jaıyq ózenine tiri túrde jiberilýde.