Almaty sırkinde jańa qoıylym bolady degendi estı sala, balalaryn jetektegen ata-ana Abaı dańǵylyndaǵy sırk ǵımaratyna aǵylady. Óıtkeni, sırk – balany da, tipti eresek adamdy da baýrap alatyn, qıal álemine samǵatatyn sahna óneriniń eń tartymdysy. Bul joly shaharymyzǵa Reseıden aty ańyzǵa aınalǵan Iýrıı Nıkýlınniń sırki keldi.
Bıyl Iýrıı Vladımırovıch Nıkýlınniń 100 jyldyǵy. Ol – mıllıondaǵan adamnyń kýmırine aınalǵan uly akter, kishkentaı kórermenderdiń júregin jaýlaǵan eń tanymal kúldirgi kloýn.
Belgili sırk jáne kıno akteri Iýrıı Nıkýlın ómirin ónerge arnaǵan jan. Ol 1949 jyldan bastap Máskeý sırkinde Mıhaıl Shýıdınmen dýet bolyp kloýnada janrynda qyzmet etti. Akterdiń jary Tatána Nıkýlına da - sırk aktrısasy. 1983 jyldan bastap Nıkýlın «Svetnoı býlvardaǵy» Máskeý sırkiniń dırektory bolyp taǵaıyndaldy. Sonaý 1880 jyly negizi qalanǵan «Svetnoı býlvardaǵy» Máskeý sırkine 1996 jyldyń jeltoqsanynda akterdiń 75 jyldyq mereıtoıyna oraı Nıkýlınniń esimi berildi. Akter ómirden ótken soń, sırkti balasy Maksım Nıkýlın basqardy. Sırk kúni búginge deıin kórermenniń kóńilin kóterip, kópshiliktiń yqylasyna bólenip keledi.
Nıkýlın sırkiniń daryndy artıseriniń ǵajap óneriniń arqasynda bul ujym álemniń eń qyzyq degen sırkteriniń qataryna engen. İrgetasy qalanǵan sátten-aq munda kelgen kórermen úıdegideı jaılylyq pen jylylyqty sezinedi. Óner ordasynyń kóptegen sahnalyq nomerleri teatrlandyrylǵan shoýǵa negizdeledi jáne sırk baǵdarlamasynyń san alýandyǵymen erekshelenedi.
Almatydaǵy sırk qoılymynda Nıkýlın sırkiniń belgili akteri, saıqymazaq Artak Arýtúnán balasy Nıkıtamen birge manejge shyǵa salysymen, kórermenderdi kúlkige qaryq qyldy. Artakty jurt «Mereke-adam» dep tekke atamasa kerek. Ol óziniń tartymdy qylyǵymen, ádemi qımyldarymen, kúlkili áreketterimen kópshilikti tánti etti. Ákesi men balasy zaldaǵy kórermenderdi de sahnaǵa shyǵaryp, keremet shoý jasap, esten ketpes kóńil-kúı syılady.
Sırktegi akrobattar men áýe gımnastarynyń ónerine tańqalmasqa shara joq. Ataqty gımnast Anastasıa Demıdova álemde eshkim qaıtalaı almaıtyn trúkterdi esh saqtandyrýsyz oryndaǵanda, demińdi ishke tartyp tamashalaısyń. Ol óziniń 15 jasynda Monte-Karlodaǵy sırk artıseri festıvalinde kúmis júldeger atanǵan.
Kásibı jongler Krıstına Gýktyń saqınalardy qolynan túsirmeı aınaldyrý sheberligi, ıkemdiligi keremet. Onyń esh tireýsiz turǵan satyǵa shyǵyp óner kórsetýi úlkendi de, kishini de tań-tamasha qaldyrdy.
Olga Gevorkánnyń artısik shoýy da ózinshe ǵajap. Ol sırk trúktaryn kórkem horeografıa jáne ásem mýzykanyń súıemeldeýimen oryndaıdy. Al Svejovtar dýetiniń sheberligi ónerdiń shyńy dersiz. Olar áýede saqtandyrýsyz kórkem trúktar jasaıdy. Artıserdiń fızıka zańdylyǵyn buzatyn kórinisterin tamashalaǵanda ertegidegi kók álemine saıahat jasaǵandaı áser alasyz. Sondaı-aq, Rýslan Faızýlınniń «Batyldyq dóńgelegi» atty tańǵajaıyp shoýyndaǵy ekstremaldy trúkterdi kórgende, adamnyń múmkindikterinde shek joqtyǵyna kóz jetkize túsesiz. Sırk artıseriniń boıyndaǵy qaısarlyq pen batyldyqqa kórermen bas ıedi. Óıtkeni, olardyń adamǵa syılaıtyn emosıasyn, áserin sózben jetkizý múmkin emes. Qaýipti, biraq ǵajap ónerdiń tarlandary halyqtyń «bravo» degen qıqýynan qýat alady.
Sırk janýarlarsyz qyzyq bola ma? Nıkýlın sırkinde myń buralǵan gımnastardan, ıkemdi akrobattar men jonglerlardan, bıshilerden bólek, qońyr aıýlardyń óneri balalar úshin óte qyzyq kórinis boldy. Esimderi kópshilikke tanymal aıý jattyqtyrýshylary Kýdrávsevterdiń shákirtteri tamasha óner kórsetti. Qońyr aıýlar sahnada dop oınap, saqına aınaldyrdy, eń qyzyǵy, olar velosıpedti, tipti kólikti keremet júrgizedi eken. Qorbańdaǵan súıkimdi artıser kórermenderdiń qoshemetine bólendi.
ALDIAR, 10 jastaǵy kórermen:
– Maǵan sırk qatty unady. Ásirese, áýe akrobattarynyń trúktaryna qyzyqtym. Olar arqanmen joǵary qaraı júrgende qulap ketetin sekildi, sondaı qorqynyshty. Biraq olar ózderin erkin ustaıdy. Sırk artıseri batyr eken.
LENA, 7 jastaǵy kórermen:
– Men Nastá Demıdova sekildi gımnast bolǵym keledi. Ol óte ádemi qyz. Onyń áýede qalyqtap bılegeni ózine sondaı jarasady. Nastá meniń ustazym bolsa ǵoı dep armandaımyn. Sırkke únemi kelgim kelip turady.
ARDAQ, kórermen:
- Iýrıı Nıkýlınniń fılmderin bala kezimizden kórip óstik qoı, ǵajap akter. Almatyǵa Nıkýlın sırki keletinin bile salysymen, 3 balamdy sırkke alyp keldim. Balalaryma qoıylym unady, olar 2 saǵat boıy tapjylmaı kórdi. Jazǵy demalys kezinde ataqty sırktiń qalamyzǵa kelgenine qýanyshtymyn. Sırkti tamashalaǵan bala akterlerdiń óneri men eńbegin kózben kórip, baǵalaıdy, qyzyǵady. Olardyń tanym-túsinikteri keńeıedi dep oılaımyn.
Nıkýlın sırkinde kezinde akter oınaǵan komedıalyq fılmderdiń saýnd-tregi qosylǵan kezde, ásirese eresekter qaýymy balalyq shaǵyna oralǵandaı ádemi áserde boldy. Ónerdi súıetin kórermen barda akterdiń esimi óshpeıdi, sırk óneri ólmeıdi.
* Qalalyqtar qaperine!
Almatyda Nıkýlın sırkiniń mereıtoılyq qoıylymy 16 shilde men 21 tamyz aralyǵynda ótedi.
Bılet baǵasy – 3000 teńgeden 6000 teńgege deıin.
4 jasqa deıingi balalarǵa tegin, biraq bólek oryn berilmeıdi.
Sırk shoýynyń uzaqtyǵy – 2 saǵat.
Sırkte kezdeskenshe!