Ony Almatydaǵy Muhtar Áýezov atyndaǵy kitaphanada tusaýy kesilgen «Shapshań tasbaqa» ertegiler jınaǵynan oqyp bilýge bolady. Qazaq ádebıetiniń kenjelep kele jatqan tusy - balalar ádebıeti desek, onyń ishinde ertegi janrynyń jazylýy da, oqylýy da sırep ketkeni ras.
Tusaýkeserge jınalǵan kózi qaraqty oqyrman balalar ádebıetine qosylǵan oljaǵa qýanyp, qalamgerler qaýymy jańa kitapty tanystyryp, lentasyn kesti. Kitaptyń avtory jýrnalıs Aınur Muratova óz balalaryna ertegi aıtyp berý kitap jazýǵa shabyt bergenin aıta kele, balanyń qolyna kitap ustatý úshin ata-ana ózinen bastasyn dedi.
Kitap budan burynǵy ertegi kitaptardan birshama jańalyǵymen, zamanaýılyǵymen erekshelenedi. Bir jaǵy qazaq tilinde, ekinshi jaǵy aǵylshynsha Twinbook formatynda jazylǵan erteginiń ishindegi QR kod arqyly múltfılm nusqasyn da tamashalaýǵa bolady. Jınaqtyń bul artyqshylyǵyn jınalǵan jurt kitap oqýy qıyn qazirgi balany qyzyqtyratyn tamasha tásil dep baǵasyn berdi.
Erteginiń tusaýyn Moldahmet Qanaz, Baıbota Qoshym-Noǵaı, Dildár Mamyrbaeva, Qanat Qaıym syndy bir top qalamger kesip, avtordyń qalamyna qýat tilep, júrekjardy sózderin arnady.
«Amerıkalyq Lamıa esimdi jazýshy qyz, (áriptesim Nazıra Baıyrbektiń jaqyn qurbysy) meniń osy búgin tusaýy kesilip, oqyrmanǵa jol tartqan «Shapshań tasbaqa» dep atalatyn ertegiler jınaǵymdy aǵylshyn tiline aýdarýǵa yqylas tanytty. Sóıtti de, ár ertegimniń aýdarmasynyń bes nusqasyn jiberip tańǵaldyrdy ǵoı. Bir nusqasy bir nusqasynan asyp túsedi. Tipti, óleńdete aýdarǵany da bar. Sol qyzymyzdyń arqasynda ertegilerim Twinbook formatynda jaryq kórdi. Odan JI arqyly anımasıalap, mátinderin Murat Almasbek pen Nazıranyń Amerıka mektebinde oqıtyn qyzyna oqytyp, bir ertegini Ǵalymjan Qaramanulynyń Anglıa mektebinde oqıtyn ulyna oqytyp, vıdeonusqasyn jasadym. Balalar aldymen qazaqsha ertegini oqyp, vıdeosyn kórip, keıin aǵylshynshasyn oqysa, tildi meńgerýge ońaı bolady. Aǵylshyn tilin tyńdap otyryp, oqysa, qazirgi til mamandary aıtyp júrgen shadowing ádisimen tildi tez úırenýge múmkindik týady», dedi ertegi avtory Aınur Muratova.