16 mamyr kúni uzaq úzilisten keıin jolǵa shyǵady.
Memleketaralyq «Almaty – Tashkent» poıyzy uzaq úzilisten keıin birinshi reısine shyǵady, dep habarlaıdy Almaty-akshamy.kz.
«Búgin 18 saǵat 32 mınýtta Almaty 2 vokzalynan «Almaty-Tashkent» qatynasyndaǵy №1/2 halyqaralyq jolaýshylar poıyzy jolǵa shyqty. 24 vagonnan turatyn quram aptasyna 3 ret qatynaıtyn bolady. Bıletter quny memleketaralyq tarıf boıynsha belgilengen. Baǵalardy www.bilet.railways.kz. saıtynan naqtylaýǵa bolady», - delingen «Qazaqstan temir joly» UK» AQ baspasóz qyzmetiniń habarlamasynda.
27.04.2022 jylǵy sheshimdi QR aýmaǵynda koronavırýstyq indettiń paıda bolýy men taralýyna jol bermeý jónindegi vedomstvoaralyq komısıa qabyldady. Bul rette «QR Memlekettik shekarasy arqyly ótkizý pýnktterindegi shekteý is-sharalary týraly» QR Bas memlekettik sanıtarıalyq dárigeriniń 29.04.2022 jylǵy №21 qaýlysynda jazylǵan talaptardy saqtaý mindetti.
Qazaqstandyqtar men shetel azamattarynyń elge temir jol kóligimen kirýi úshin burynǵydaı teris nátıjesi bar COVID-19-ǵa PTR testileýden ótkeni týraly anyqtamanyń bolýy mindetti. Anyqtama berilgen kúnnen bastap 72 saǵattan aspaýy kerek. Nemese koronavırýstyq indetke qarsy ekpe nemese qaıta ekpe qabyldaýdyń tolyq kýrsynan ótkeni týraly pasport usyný qajet (sońǵy dozany alǵannan keıin 6 aıdan aspaıtyn merzim). Eger PTR testiniń nátıjeleri nemese COVID-19 vaksınasıasynyń pasporty bolmasa, onda jolaýshylar vagonǵa otyrǵyzýǵa jiberilmeıdi.
Ertip júretin adamdary bolsa 5 jasqa deıingi balalarǵa, QR úkimettik delegasıalarynyń jáne lokomotıv brıgadalarynyń múshelerine anyqtamasyz elge kirýge ruqsat etiledi. Sondaı-aq – temirjol, teńiz jáne ózen kóligindegi tasymaldaý qyzmetimen baılanysty jáne eger 2 komponentti alǵannan keıin QR shekarasyn kesip ótý sátinde 6 aıdan aspasa, QR-da qaıta ekpe qabyldaǵan nemese COVID-19-ǵa qarsy ekpeniń tolyq kýrsyn alǵan adamdarǵa beriledi. Qujattamalyq rastaý mindetti bolyp tabylady. Bul ereje elimizdiń bas memlekettik sanıtarlyq dárigeriniń qaýlysyna sáıkes QR aýmaǵynda jaramdy dep tanylǵan, COVID-19-ǵa qarsy vaksınasıa týraly pasport/sertıfıkat/anyqtama usynǵan adamdarǵa da qoldanylady.
Jolaýshylar poıyzdarynyń qozǵalys kestesi boıynsha anyqtamalyq aqparatty «1433» nómiri boıynsha jáne Bilet.railways.kz. saıtynan alýǵa bolady.