Qazaqstandaǵy alǵashqy Eko-Habtyń Almatyda sátti júzege asyrylǵan tájirıbesi óńirlerde de tarala bastady. Semeı qalasynda alǵashqy óńirlik ekologıalyq aǵartý, qaldyqtardy suryptaý jáne apsaıklıng ortalyǵy ashylady. Bul joba Almatydaǵy Eko-Hab úlgisinde júzege asyrylady, dep habarlaıdy aqshamnews.kz
Joba EA Charity bastamasymen jáne ekobelsendi Evgenıı Mýhamedjanovtyń qoldaýymen iske asady. Ol ECO Network ekologıalyq platformasynyń negizin qalaýshy jáne jobany Semeı qalasy men Abaı oblysy ákimdikteri qoldap otyr. Abaı oblysyndaǵy jańa hab ekologıalyq aǵartý, qaldyqtardy suryptaý, sheberlik sabaqtaryn ótkizý jáne jergilikti qoǵamdastyqty turaqty ekologıalyq tájirıbelerge tartý alańyna aınalmaq.
«Almatyda alǵashqy Eko-Habtyń qurylýy qalalyq ekologıalyq ınfraqurylymdy damytýdyń mańyzdy qadamy boldy. Bizdiń tájirıbemiz óńirlerdi shabyttandyryp, osyndaı bastamalardyń búkil el boıynsha júzege asyrylyp jatqanyna qýanyshtymyz. Bul turaqty damý men ekologıalyq bilim berý megapolıstermen qatar, Qazaqstannyń barlyq mádenı óńirleri úshin de basymdyqqa aınalyp jatqanyn kórsetedi. 2024 jylǵy 31 mamyrda bizdiń kompanıanyń jobalary, sonyń ishinde Eko-Hab, Memleket basshysyna tanystyrylyp, joǵary baǵa aldy», – dedi Almaty Eko-Habynyń negizin qalaýshy Evgenıı Mýhamedjanov.
Almatydaǵy Eko-Hab 2024 jyldyń 5 maýsymynda Almaty qalasynyń Ekologıa jáne qorshaǵan orta basqarmasynyń qoldaýymen ashylǵan bolatyn. Bir jylǵa jetpeıtin ýaqytta ortalyqqa 10 000-nan astam turǵyn kelip, kúnine 20-dan 100-ge deıin adam suryptalǵan qaldyqtaryn ákelip, ekologıalyq bilim berý sharalaryna qatysýda. Ortalyq mektepter men balabaqshalar úshin shamamen 50 sheberlik sabaǵyn ótkizdi. Sabaqtardan keıin balalar úılerinde qaldyqtardy bólek jınaýdy engizip, ata-analaryn da osy bastamaǵa tartýda.
Semeıdegi Eko-Hab jylyna 15-25 myń adamdy qabyldaýǵa baǵyttalǵan jáne 80-ge jýyq is-shara ótkizýdi josparlap otyr. Olardyń qatarynda mektep oqýshylaryna arnalǵan bilim berý ekskýrsıalary men aımaqtaǵy bıznesti jáne memlekettik organdardy ekologıalyq bastamalarǵa tartý sharalary bar. Jobaǵa EA Group holdıńiniń korporatıvtik qaıyrymdylyq qory – EA Charity qarjylaı qoldaý kórsetip otyr.