Qazaqstan teatry tarıhynda alǵash ret Almatynyń tórt teatr ujymy álemdegi eń iri táýelsiz teatr festıválderiniń biri – Fransıada ótetin Avignon Off festıvaline qatysady. Festıvál 2025 jyldyń shilde aıynda ótedi, dep habarlaıdy aqshamnews.kz
Delegasıa quramyna Qazaqstannyń jetekshi táýelsiz eki teatry – ARTiSHOK jáne JOLDA, sondaı-aq Memlekettik qýyrshaq teatry men Alataý memlekettik teatry kiredi. Bul ujymdardyń festıválge qatysýy qazaqstandyq teatr sahnasynyń halyqaralyq moıyndalýyna jáne elder arasyndaǵy mádenı dıalogtyń nyǵaıýyna mańyzdy qadam bolmaq.
Joba Almaty qalasy ákimdiginiń qoldaýymen júzege asyrylýda, al onyń uıymdastyrý jáne úılestirý jumystaryn Almaty Creative kreatıvti ındýstrıalardy damytý ortalyǵy atqarady.
«Bul Almaty úshin strategıalyq qadam: biz ártisterimizge jańa múmkindikter ashyp, qazirgi zamanǵy qazaqstandyq ónerdi halyqaralyq arenada kórsetip, mádenı dıplomatıanyń berik negizin qalaımyz», – dedi Almaty Creative ortalyǵynyń bas dırektory mindetin atqarýshy Baqyt Elúbaeva.
Avignon Off festıvali – Avınondaǵy resmı festıválge paralel ótkiziletin baǵdarlama, jyl saıyn álemniń túkpir-túkpirinen júzdegen táýelsiz trýppany jınaıdy. Avignon Off festıvaline qatysý ártisterge ózderin tanytýǵa, halyqaralyq baılanystar ornatýǵa jáne damý joldaryn ashýǵa múmkindik beredi.
Almaty baǵdarlamasy festıvál aıasynda túpnusqa avtorlyq qoıylymdardy, sondaı-aq klasıkalyq sújetterdiń zamanaýı ınterpretasıalaryn qamtıdy, bul qazaqstandyq teatrlardyń kórkemdik tiliniń baılyǵyn kórsetedi.