Jumystardyń oryndalýy búdjettik ótinimde egjeı-tegjeıli kórsetilgen.
QR Prezıdentiniń is basqarmasy Almatydaǵy Prezıdent rezıdensıasyn súrip tastaýǵa 6 mlrd teńge jumsalatynyn málim etti, dep habarlaıdy Almaty-akshamy.kz QazAqparatqa silteme jasap.
Bul týraly Prezıdenttiń is basqarýshysy Aıbek Dádebaev Telegram-kanalynda jazdy.
«BAQ ókilderinen Prezıdenttiń Almaty qalasyndaǵy qıratylǵan rezıdensıasyna qatysty kóptegen suraqtar kelip jatyr. Búgingi jaǵdaı týraly aıtaıyn. Qazaqstandyq kópbeıindi rekonstrýksıa jáne damý ınstıtýtynyń tehnıkalyq qorytyndysy boıynsha rezıdensıanyń jaǵdaıy paıdalanýǵa shekteýli jaramdy degen sanatqa jatqyzyldy. «Qazrestavrasıa» RMK mamandary tekserý júrgizip, ólshemderin aldy, sonyń nátıjesinde obektini tarıh pen mádenıet eskertkishteriniń tiziminen shyǵarýdy usyndy. Mádenıet jáne sport mınıstrligi tarıhı-mádenı saraptama negizinde obektini eskertkishter tiziminen shyǵarýǵa, sheshim qabyldady: negizgi ǵımarat pen irgeles obektiler bólshektenedi», - dep jazdy ol paraqshasyna.
Aıtýynsha, eń aldymen, saqtaýly turǵan, ıaǵnı tońazytqysh tehnıkalar, úzdiksiz qýat kózderi, dızel-generatorlar – barlyǵy shamamen 600 mıllıon teńge somasyndaǵy 46 ataýly qural-jabdyq shyǵarylady.
«Bul qural-jabdyq İs basqarmasynyń basqa obektilerinde qoldanylatyn bolady. Shamamen 1800 tonna metaldy qaıta óńdeýge jiberemiz (bul da búdjetke qaıtarylatyn 150 mıllıon teńge). Jalpy qaıtarylatyn qarajat - 750 mln teńge. Negizgi ǵımarat pen irgeles obektilerdi bólshekteý úshin 3 mıllıard teńge qarastyrylǵan. Taǵy 3 mıllıard teńge aýmaqty qalpyna keltirýge jáne ınjenerlik korpýsty qaıta qurylymdaýǵa kózdelgen, olar qalanyń teńgerimine ótetin obektiler. Jumystardyń oryndalýy búdjettik ótinimde egjeı-tegjeıli kórsetilgen. Rezıdensıanyń aýmaǵyndaǵy dóńniń astynda ornalasqan ınjenerlik korpýsty qaıta qalpyna keltirýdi josparlap otyrmyz. Ol saıabaqtyń landshaftyna saı keledi. Onyń ishinde transformatorlyq kishi stansıa ornalasqan, ol jaqyn mańdaǵy úılerge, ınjenerlik qurylǵylarǵa, qyzmetkerlerge arnalǵan orynjaılarǵa qyzmet kórsetedi. Tolyq jumys isteıtin kópbeıindi orynjaı bolady. Qazirgi kezde onyń tirshilikke mańyzdy toraptary kúrdeli jóndeýdi qajet etedi, ıaǵnı shatyryn zamanaýı túrine aýystyrý, sýaǵarlar sanyn kóbeıtý, ınjenerlik jabdyǵyn túgel aýystyrý qajet», - deıdi Aıbek Dádebaev.
Onyń sózine qaraǵanda, obektiniń syrtyn árleý boıynsha da úlken jumys júrgizý kerek.
«Otyz jylda bul ǵımaratty salǵan kezdegi paıdalaný standarttary da eskirdi. Osylaısha, biz qalaǵa daıyn aýmaq pen jańartylǵan ınjenerlik korpýsty tapsyramyz», - dep jazdy Prezıdenttiń is basqarýshysy.
Eske sala keteıik, Almatydaǵy Prezıdent rezıdensıasy tarıhı eskertkishter tiziminen alynyp tastalǵan bolatyn.