Qazir joba aıaqtalyp, qurylysy júrip jatyr.
Almatyda qurylysy júrip jatqan «Qalqaman» stansıasy mańynda 2 myń kólikke arnalǵan turaq paıda bolady, dep habarlaıdy Almaty-akshamy.kz.
Áýezov aýdanynyń túrǵyny qala ákimi Erbolat Dosaevtan: "Abaı – Iassaýı kósheleriniń qıylysyndaǵy metro stansıasy mańynda avtoturaq nege joq?" - dep surady.
«Metro stansıasy salyndy, biraq kólikterge arnalǵan turaq ashpady. Adamdar qaladan keledi, kólikterin jaqyn mańdaǵy kóshelerge qaldyrady. Olardyń tolyp ketkeni sonsha, ol jerge "jedel járdem", qoqys tasıtyn kólikter bara almaıdy»,- dedi Áýezov aýdanynyń turǵyny.
Turǵynnyń saýalyna Almaty qalalyq mobıldilik basqarmasynyń basshysy Ǵanı Myrzahanov jaýap berdi.
«Baýyrjan Momyshuly» metro stansıasynyń mańynda avtoturaq salatyn jer joq. Áshimov-Abaı kósheleri deńgeıinde salynyp jatqan «Qalqaman» stansıasynyń janynan 2000 kólikke arnalǵan turaq salý josparda bar. Qazir joba aıaqtalyp, qurylysy júrip jatyr»,- dedi basqarma basshysy.
Almaty ákimi Ǵanı Myrzahanovqa polısıa departamentimen birge atalǵan mekenjaıǵa baryp, stansıa mańyndaǵy kólik qozǵalysyn qaraýdy tapsyrdy.