Bul týraly qala ákimi Erbolat Dosaev málim etti.
Almaty ákimi Erbolat Dosaev «Azıa daýysy» jáne basqa da mýzykalyq festıválderdi jańǵyrtý josparda bar ekenin atap ótti, dep habarlaıdy Almaty-akshamy.kz.
Qala ákimimen kezdesýge kelgen Áýezov aýdany turǵyndarynyń biri Almatyda ótetin mádenı is-sharalarǵa qatysty suraq qoıdy.
«Men jaqynda Dımash Qudaıbergenniń konsertine bardym. 30 myńnan astam adam boldy, onyń jartysy – týrıs. Osyndaı konsertterdiń jıi ótkizilip turǵanyn qalaımyn, osylaısha qalanyń mýzykalyq astanaǵa aınalýyna múmkindik týady – adamdar keledi, jumys oryndary ashylady. Bizde tanymal dıdjeı Imanbek bar, ony da shaqyrýǵa bolady. Almatynyń mádenıet pen mýzykany damytýǵa múmkindikteri bar dep oılaımyn», - dedi ol.
Erbolat Dosaev Mádenıet jáne sport mınıstrligimen birlese otyryp, «Azıa daýysy» jáne basqa da mýzykalyq festıválderdi jańǵyrtý josparda bar ekenin atap ótti.
«Máslıhat qoldaǵan Almaty qalasyn damytý baǵdarlamasynda aýqymdy josparlar bar. Jyl saıyn adamdar bizge kelýi úshin kem degende 30 turaqty is-sharany josparlap otyrmyz. Mádenıet jáne sport mınıstrligimen birlese otyryp, «Azıa daýysy» jáne basqa da tarıhı qalyptasqan mýzykalyq festıváldar men is-sharalardy jańǵyrtý kózdelgen. Dımash Qudaıbergenniń konsertine keler bolsaq, bul – Ortalyq stadıonda sońǵy 25 jylda alǵash ret jasalǵan eksperıment. Óte jaqsy ótti. «Medeýdegi» festıváldy qaıtarǵymyz keledi. Usynysyńyzǵa rahmet!» - dedi shahar basshysy.