Jol belgilerin salýǵa 17,7 mln teńge jumsaý josparlanyp otyr.
Almaty qalasyndaǵy jol boıyndaǵy komýnaldyq ashyq jáne jabyq avtoturaqtar endi jeke avtoturaqtardan erekshelenip, kók túspen belgilenedi. Bul týraly Almaty qalasynyń aqyly avtoturaqtaryn uıymdastyrý erejelerin bekitý týraly erejelerine engiziletin ózgeristerden belgili boldy. Kók tústi jol belgilerin salýǵa qala búdjetinen 17,7 mln teńge jumsaý josparlanyp otyr, dep habarlaıdy almaty-akshamy.kz.
Jobada, sondaı-aq buǵan deıin belgili bolǵandaı, elektrondy tólem termınaldarynyń alynyp tastalatyny jazylǵan. Oǵan sebep – qazirgi tańda tólemderdiń 98 paıyzy banktik aýdarym arqyly júzege asyrylatyny
"QR kod skaneri barlyq smartfondarǵa ornatylǵan, sondyqtan QR kody qolma-qol aqshasyz tólem jasaýdyń eń qoljetimdi, yńǵaıly jáne jyldam quraldarynyń birine aınaldy, óıtkeni QR kod arqyly tóleý karta tólemderin qosymsha quraldarsyz qabyldaýdan erekshelenedi. Óz kezeginde elektrondy termınaldardy ustaý, elektrondy termınaldardan aqsha jınaý, sondaı-aq olardyń qaýipsizdigin qamtamasyz etý qosymsha qarjylyq shyǵyndardy talap etedi", – delingen jobanyń túsindirme jazbasynda.
Esesine, komýnaldyq aqyly avtoturaq ornalasqan jol boıyna bos oryndar sanyn kórsetetin elektrondyq qurylǵylar ornatylýy múmkin.
Eske salaıyq, Almaty qalasynyń avtoturaqtary menshik túrine baılanysty komýnaldyq jáne jeke bolyp bólinedi:
komýnaldyq avtoturaq – nysanaly maqsatyna sáıkes paıdalaný úshin Almaty qalasynyń komýnaldyq menshigindegi ýákiletti organ uıymdastyrǵan jáne zańnamamen belgilengen tártipte paıdalanýǵa berýshi uıymnyń basqarýyna berilgen avtoturaq;
jeke menshik avtoturaq – nysanaly maqsatyna sáıkes jerdi paıdalaný quqyǵyna ne jer teliminiń menshik quqyǵyna ıe memlekettik emes zańdy tulǵa nemese jeke kásipker uıymdastyrǵan avtoturaq.