Sonymen qatar 2025 jyldan bastap áleýmettik qyzmetkerler reestri jasalady.
Áleýmettik qyzmetkerlerge arnalǵan Jańa kásibı standart jobasy qurastyrylyp boldy, qazir talqylanyp jatyr, dep habarlaıdy Almaty-akshamy.kz
Bul týraly QR eńbek jáne halyqty áleýmettik qorǵaý vıse-mınıstri Nazgúl Saǵyndyqova Áleýmettik jumys mektepteriniń ulttyq qaýymdastyqtarynyń 4-shi Ortalyq Azıa (Astana) Forýmynda aıtty.
"Kategorıasy, kvalıfıkasıa deńgeıi men kórsetiletin qyzmettiń túrine qaraı áleýmettik jumyskerlerge jalaqy tóleý júıesi qaıta qaralady. Bul baǵytta QR eńbek jáne halyqty áleýmettik qorǵaý mınıstrligi Áleýmettik qyzmetkerlerdiń ulttyq alánsymen tikeleı baılanysta. Áleýmettik qyzmetkerlerge arnalǵan Jańa kásibı standart jobasy qurastyrylyp boldy, qazir talqylanyp jatyr", — dedi Nazgúl Saǵyndyqova.
Sonymen qatar 2025 jyldan bastap áleýmettik qyzmetkerler reestri jasalady. Onda jumyskerdiń kvalıfıkasıasy, qyzmetteriniń túrleri men sapasy jaıly tolyq maǵlumat beriledi.
"Osy jyldyń 1 shildesinen bastap áleýmettik qorǵaý ınspektorlary óz jumysyn bastady. Olar múgedektigi bar adamdardy áleýmettik qorǵaýmen, áleýmettik, zeınetaqylyq qyzmetterdiń oryndalýyn qadaǵalaıdy. Oǵan qosa áleýmettik qyzmetter portaly iske qosyldy, qazan aıynda portaldyń smartfondarǵa arnalǵan qosymsha nusqasy jasaldy", — dedi vıse-mınıstr.
Búgin elimizdiń 12 aýdanynda múgedektigi bar adamdar úshin jańa ońaltý ortalyqtary salynatyny habarlandy.
"Qazaqstannyń 6 aımaǵynda arnaıy áleýmettik qyzmetter kórsetetin pılottyq joba qolǵa alyndy. Semeı men Taraz qalalarynda zamanaýı ońtalandyrý ortalyqtary ashyldy, onda úlkender de, balalar da ózderine qajetti qyzmetti ala alady. Elimizdiń taǵy 12 aýdanynda múgedektigi bar adamdar úshin jańa ońaltý ortalyqtary salynbaq", — dep habarlady Mınıstrlik ókili.
Respýblıkada barlyǵy 900 uıym arnaıy áleýmettik qyzmetter kórsetýmen aınalysady. 2025 jyldan bastap jańa Áleýmettik kodeks aıasynda adam basyna shaqqandaǵy qarjylandyrý júıesi engiziledi. Al uıymdardyń barlyq qarjysyn respýblıkalyq deńgeıde bir arnaǵa shoǵyrlandyrý josparlanyp otyr.