Almaty qalasynyń Sybaılas jemqorlyqqa qarsy qyzmeti joldardy salý jáne jóndeý jumystaryndaǵy jemqorlyq táýekelderge taldaý júrgizý úshin arnaıy jıyn ótkizdi. İs-sharaǵa memlekettik organdar, Jol aktıvteri sapasynyń ulttyq ortalyǵy Almaty fılıalynyń ókilderi, tapsyrys berýshiler men merdigerler kompanıalar qatysty, dep habarlaıdy aqshamnews.kz.
Almatynyń jol ınfraqurylymy azamattar tarapynan da, buqaralyq aqparat quraldary tarapynan da jıi synǵa ushyraıdy. Osyǵan baılanysty sybaılas jemqorlyqqa qarsy mekeme joldardy salý men jóndeýge búdjet qarajatyn josparlaý jáne jumsaý prosesterin egjeı-tegjeıli taldaýǵa erekshe nazar aýdarýda. Almaty qalalyq Sybaılas jemqorlyqqa qarsy qyzmetiniń basshysy memlekettik organdar birlesip jumys isteý keregin atap ótti.
«Almaty qalasynda jol salý men jol jóndeý salsyndaǵy qazirgi máselelerdi sheshý úshin barlyq múddeli taraptardyń kúsh-jigerin biriktirý qajet. Óıtkeni sapaly jol qurylysy turaqty ekonomıkalyq ósý, ınvestısıalyq tartymdylyqty arttyrý jáne azamattardyń ómir súrý sapasyn jaqsartý úshin óte mańyzdy», - dedi Arman Rahımov.
2020-2024 jyldar kezeńinde Almaty qalasynyń joldaryn jóndeýge shamamen 242,4 mlrd. teńge bólindi. Bólinetin qarajattyń kólemi qomaqty. Alaıda osy saladaǵy kemshilikter men sybaılas jemqorlyq táýekelderi anyqtaldy:
- tıimsiz josparlaý (iske asyrylmaǵan jobalyq smetalyq qujattar, jylý-sýmen jabdyqtaý jelilerin jóndeýden keıin jol tósemin qaıta qalpyna keltirmeý);
- memlekettik satyp alý týraly sharttardyń merzimderin uzartý kezindegi olqylyqtar;
- bir kóshede jóndeý jumystaryn eki ret oryndaý faktisi;
- shekaralar men irgeles aýmaqqa qoıylatyn talaptardy qamtamasyz etpeý;
- qosalqy merdigerlerde jol qurylysy salasynda tıisti materıaldyq-tehnıkalyq jaraqtandyrýdyń jáne tájirıbeniń bolmaýy.
Budan basqa, is-shara barysynda arnaıy jumys tobynyń kóshpeli monıtorıńiniń nátıjeleri aıtyldy, onda anyqtalǵan buzýshylyqtar toltyrylyp jáne ýákiletti organdardyń atyna tıisti usynymdar engiziledi. Jol aktıvteri sapasynyń ulttyq ortalyǵy Almaty fılıalynyń mamandary qurylys nysandaryn birlesip tekserýlerge turaqty túrde qatysyp, anyqtalǵan kemshilikterdi habarlaıdy.
«Qazirgi tańda Almaty qalasynda joldardy ortasha jóndeý men aǵymdaǵy jóndeý jumystary qarqyndy júzege asýda. Bizdiń mekeme qala jol jelileriniń sapasyn tekserýmen, jol qurylysy barysyn qadaǵalaýmen turaqty túrde aınalysady. Fılıal mamandaryna jemqorlyqtyń aldyn alý, jemqorlyq táýekelderdi boldyrmaý boıynsha únemi profılaktıkalyq jumys júrgiziledi. Al joldardy tekserý barysynda anyqtalǵan kemshilikter birden ortaq bazaǵa engizilip, tıisti organdarǵa joldanady», - deıdi fılıal dırektory Máýlen Toqtarbaıuly.
Basqosý barysynda merdigerlik uıymdardyń pikirleri men usynystary tyńdaldy. Problemalyq máseleler talqylanyp, memlekettik organdar men múddeli tulǵalarǵa naqty usynystar berildi. Taraptar ótkizilgen is-sharany syndarly jáne jemisti dep tanyp, osyǵan uqsas is-sharalardy júıeli túrde ótkizý týraly ýaǵdalastyqqa qol jetkizdi.