Jańa oqý jylynyń bastalýyna eki aptaǵa jýyq ýaqyt bar. Kópshilik úıdegi oqýshylarynyń oqý-quraldaryn, kıim-keshekterin túgendep bolsa, jazǵy demalys pen jumystan qoly tımegender arasynda áli de qamdanbaǵandar bar eken. Bir balany mektepke daıyndaýǵa orta eseppen qansha qarajat shyǵady?
Búgin osy taqyrypty saralap kórdik:
Alysqa barmaı, úıde de oqýshylar ósirip otyrǵannan keıin, sol ózim qatarly ata-analar chatyna «mektepke daıyndyq qalaı? Qansha aqsha jumsap jatyrsyzdar? Bir balaǵa orta eseppen qansha aqsha jumsadyńyzdar?» dep saýal tastadym. Jaýaptar san túrli.
- Byltyr 3 balaǵa 300 myńdaı ketti, bıyl áli barmadyq.
- Glasmannan eki kofta, bir ıýbka (beldemshe) 27000 boldy.
- Shalbar men kostúm ǵana 26000 boldy.
- 35000 tg. 7synypqa kostúm-shalbar ǵana baraholkadan alyndy.
- Osy joly qymbat, byltyr ondaı bolmaǵan.
- Men keshe bardym baraholkaǵa, óńkeı qytaıdyń kıimderi sapasyz. Kıim kóp, baıkap karamasańyzdar, qytaıdikin Túrkıa dep satyp jiberedi eken.
- Túrkıada shyǵarylǵan kıimderdi áreń taptyq, Kók bazarǵa qaraǵanda arzan kishkene bolsa da
- Tek kostúm men sportıvkasyna 50 myń ketti, áli aıaq kıimderin almadyq.
- Aq jeıde 11500, týflı 26500-ge aldyq, rúkzak 17000, krosovkı 15500. Áli alynbaǵan zattar bar. Shetinen alyp jatyrmyz.
Pikirler de, baǵalar da ár túrli. Degenmen, jyl ótken saıyn balany mektepke daıyndaýda tájirıbeli bolyp alǵan analar da kezdesedi eken:
"Men balalarymdy buryn qymbat kıindiretin edim. Osy joly kózim jetkeni, balaǵa qymbat zattar alýdyń qajeti joq eken. Óıtkeni bala jylda ósip ketedi, oqý jyly bitpeı jatyp, kıimderi ózderine shaq bolmaı qalady eken. Sol úshin osy jyly kans tovarlardyń barlyǵyn almadym, eń basta kerekterin ǵana aldym qalǵandaryn surap jatsa alyp beremin dedim. Osy joly úsh balamnyń kıimine aıaq kıimine barlyǵy 40 myń jumsadym. Aıaq kıimder jeńildikpen satylyp jatyr eken, dál tústim. Osy joly sómke da alyp bermedim, óıtkeni sýmkalary bar. Taza, jyrtylmaǵan. Balaǵa qymbat nárse alýdyń qajeti joq eken, sony túsindim. Óıtkeni jyl saıyn alý kerek, jyl saıyn bala ósip ketedi. Bul aqshany únemdeý emes, maǵan tıimdisi osy bolyp tur", - deıdi úsh oqýshyny tıimdi baǵada mektepke ázirlegen ana.
Qarjyny qaıtip jetkizemin degen ata-analarǵa paıdaly-aq keńes.
Almatyda ne kóp!? Bazar men saýda oryndary kóp. Solaı bola tura, qaltasynyń túbine qaraǵan qarasha qazaq otbasylary baraholka jaǵalaıtyny anyq. Endeshe, sol baraholkanyń baǵasyna qarap mektepke daıyndyq baǵasyn baǵamdaı bereıik. Eskertý: biz bul jerde ortasha baǵany kórsetýge tyrystyq:
Kostúm-shalbar (qyzdarda sarafan nemese kostúm-úbka) – 18-25 myń, (10-15 myńǵa da tabýǵa bolady, biraq sapasy baǵasyna saı)
Sport kıimi – 15-20 myń (11-13 myń teńgege de tabýǵa bolady, biraq taǵy da sapasyna qaraý kerek)
Krosovka – kıýge bolady dep aqshany barynsha qysyp alǵannyń ózinde qalypty baǵalary 25 myńnan bastalady
Týflı - 15-20 myń (eń arzandaryn 5-6 myńǵa tabýǵa bolady)
Aq jeıde – arzany 5 myńnan bastalady, jaqsy degenderi 15 myńnan ary kete beredi
Kıimdi túgendep bolsaq, oqý quraldaryn da umytpaıyq.
Sómke – 10-15 myńnyń mańynda (arzan degenderi 5-6 myńnan bastalady)
Dápter, qalam-qaryndash, sýret dápteri, kitap-dápterdiń tysy, syzǵysh, jelim, t.b. tizimdegi taýsylmaıtyn «keńse quraldary» dep atalatyn zattarǵa da az degende 25-30 myń jumsalady. Bir balaǵa. Endi ar jaǵyn ár balaǵa qosyp, kóbeıte berseńiz bolady.
Biz ózimiz baryp, kózben kórgendegi baǵalardy usynyp otyrmyz. Satýshylar aıtpaqshy, «aspannan alǵan baǵa» emes.
Bul – ózimiz úırengen «baraholkanyń» baǵalary. Basqalarynyń baǵalary aıtpasa da túsinikti bolar. Bir balany mektepke daıyndaýǵa júz myń eshteńe emes bop qalady. Úmit etip otyrǵan kózderiniń nury – balalaryn ata-analaryn qatarynan qaldyrmaýǵa tyrysatyny anyq. Oqyrman qaýymǵa oı salyp, bala oqytyp, ony ósirý ońaı sharýa emes ekenin eske salyp qoıǵymyz keldi. Bastysy – bilim men tárbıe basqa qonsa bolǵany.