Munda eń sońǵy ret 1978 jyly máıit jerlengen.
Medeý aýdanynyń turǵyndary shaǵymdanyp otyr, dep habarlaıdy Almaty-akshamy.kz
Olardyń aıtýynsha, qorym birneshe jyldan beri qaraýsyz qalǵan. Aýmaq qorshalmaǵandyqtan, tóńirekti qadaǵalaý qıynǵa soǵady eken. Odan qalsa, kóne zırat birneshe jeke sektorly úıge irgeles ornalasqan. Sonyń kesirinen keıbir beıit turǵyn úı aýlalarynda jatyr.
Aınalasy qorshalmaǵan aýmaq kóshe kezgenderdiń turaqty mekenine aınalǵan. Jergilikti turǵyndardyń aıtýynsha, olar osynda toptasyp otyrady, keıin aınalasyn qoqysqa toltyrady. Qajet bolsa, zırattardyń janyna qonyp ta qalatyn kórinedi.
"Mazar qoqys úıindisine aınalǵandaı. Qarap-qadaǵalap, kútim jasap jatqan eshkim joq. Odan bólek, bul jerge eshkim zertteý júrgizbegen. Elge tanymal, kórnekti tulǵalardyń osynda bolmasyna kim kepil? Qolymyzdaǵy tarıhty ózimiz óshirip otyrmyz. Túrli vandalızm bolǵanyn anyq kórýge bolady. Temirlerdi qıratqan. Belgilerdi julyp alyp ketken",– deıdi qoǵam belsendisi Evgenıı Morozova.
Aty-jóni belgisiz beıittiń turǵyzylǵanyna jarty ǵasyrǵa jýyqtapty. Úı ıesiniń aıtýynsha, ony eshkim izdep kelmeıtin de kórinedi. Jergilikti jurt tún ishinde úıge kirip-shyǵýymyzdyń ózi qorqynyshty dep otyr.
"Bul mazarda jerlengenderdiń basym kópshiligi – soǵys ardagerleri. Máselen, meniń eki atam da osynda jatyr. Qolymnan kelgenshe ara-tura baryp aınalasyn tazartyp, kútim jasaýǵa tyrysamyn. Biraq ózderińiz kórgendeı, aýmaq óte úlken. Kópshiligi 1800 jyldardyń týmalary. Arttarynan eshkim izdep kelmeıdi de", – deıdi qala turǵyny Rıma Gorynına.
Medeý aýdandyq ákimdiginiń aıtýynsha, zırat óte kóne. Munda eń sońǵy ret 1978 jyly máıit jerlengen. Qazir aýmaqty qorshaý jumystary qarastyrylyp jatyr eken.
Aýmaǵy 3 gektar bolatyn at shaptyrym jer aldaǵy ýaqytta kópshilikke demalys aımaǵy retinde paıdalanýǵa berilýi de múmkin. Ortaq talap boıynsha – birneshe jyl turǵan qorymdar ústine saıabaq nemese basqa da qoǵamdyq ǵımarat salynatyny belgili. Dese de, jergilikti ákimdik árbir jumys turǵyndarmen keńese otyryp júrgiziletinin aıtty.