BRT qurylysy aıasynda Almatyda qoǵamdyq kóliktiń sapasyn arttyrý boıynsha óziniń oıyn Jolaýshylar tasymaly kásiporyndary qaýymdastyǵy tóraǵasynyń orynbasary Dana Ahatova aıtty, dep habarlaıyd almaty-akshamy.kz
Ol mańyzdy kólik qatynasynyń kúre jolyna aınalǵan Raıymbek dańǵyly qalanyń shyǵys jáne batys baǵyttaryn baılanystyratynyn atady. Búginde bul dańǵylda 88 marshrýt boıynsha 1300-den astam avtobýs júredi, kún saıyn 730 myńǵa jýyq jolaýshyǵa qyzmet kórsetedi, bul qalanyń jalpy jolaýshylar aǵynynyń jartysyna jýyq.
Almaty aglomerasıasynyń ortalyǵy retinde Almaty – qala mańyndaǵy aımaqtardy eskere otyryp, Qonaev qalasyn, Gate city jáne kóptegen aýdan ortalyǵyn qamtıdy. D. Ahatovanyń pikirinshe, BRT úshin usynylǵan arnaıy jolaq jolaýshylar úshin jyldam ári yńǵaıly sapardy qamtamasyz etip, jolǵa jumsalǵan ýaqyt pen qozǵalys aralyǵyn qysqartady. Bul qala turǵyndarynyń mobıldiligin jaqsartyp, qala ekologıasyna oń áserin tıgizedi.
«Qalanyń avtobýs marshrýttarynyń 40%-dan astamy Raıymbek dańǵyly arqyly júredi, bul atalǵan ınfraqurylymnyń qoǵamdyq kólik úshin mańyzdylyǵyn kórsetedi. Raıymbek dańǵylyna BRT engizý qoǵamdyq kóliktiń tartymdylyǵyn arttyrýdy kózdeıdi, bul óz kezeginde halyqty qoǵamdyq kólikke otyrýǵa yntalandyrýǵa tıis», - dedi Jolaýshylar tasymaly kásiporyndary qaýymdastyǵy tóraǵasynyń orynbasary.
Esterińizge sala keteıik, buǵan deıin qala ákiminiń 2030 jylǵa deıingi Almaty qalasynyń kólik qańqasynyń sheber josparyn bekitkeni týraly habarlanǵan bolatyn. Sheber jospar Almatynyń kólik ınfraqurylymyn jetildirýdiń negizgi baǵyttaryn aıqyndaıtyn strategıalyq qujat bolyp tabylady. Ol Almatynyń damý baǵdarlamasy men 2040 jylǵa deıingi Bas jospar aıasynda qalany damytýdyń negizgi perspektıvalaryna sáıkes ázirlendi. Kólik qańqasynyń pılottyq dálizimen Raıymbek dańǵylynyń batysynda Abaı kóshesinen («Barlyq» bazarynyń mańaıy) Pýshkın kóshesine deıingi uzyndyǵy 17 km ýchaskesi tańdaldy. Ol 2024 jyldan júzege asyryla bastaıdy.