Saǵadat Nurmaǵambetov atyndaǵy Qurlyq áskerleriniń áskerı ınstıtýtynda sońǵy eki jylda bilim ordasyn aıaqtap, rota komandırine deıin ósken jas ofıserlermen kezdesý ótti.
İs-sharaǵa profesor-oqytýshylar quramy, joǵary oqý ornynyń kýrsanttary, Qarýly kúshterdiń ardagerleri, áskerı mektepterdiń tárbıelenýshileri men jas ofıserlerdiń týǵan-týystary qatysty, dep habarlaıdy aqshamnews.kz Qorǵanys mınıstrligine silteme jasap.
Qarýly kúshterdiń sapaly jańa ofıserler korpýsyn qalyptastyrý jónindegi Qorǵanys mınıstrliginiń 2013 jyldan beri jumys istep kele jatqan baǵdarlamasyn basshylyqqa ala otyryp, joǵary oqý oryndary óz túlekteriniń keleshegin qadaǵalaıdy.
Qurlyq áskerleri bas qolbasshysynyń orynbasary polkovnık Baýyrjan Ábirov 14 úzdik jas ofıserge «Úzdik maman» belgisin jáne baǵaly syılyqtar tabys etti.
Qarýly kúshterdiń ardageri general-polkovnık Álibek Qasymov túlekterdi aıtýly kúnmen quttyqtady.
– Árbir ofıser mádenıeti joǵary jáne óz isiniń maıtalmany bolyp qana qoımaı, ony jeke quramnan talap etýi mańyzdy. Barlyq jaǵynan salmaqty bolýǵa tyrysyp, ásirese qol astyndaǵylardyń áreketterin baǵalaýǵa qatysty máselelerdi qarastyrǵan kezde asyǵys sheshim qabyldamaý kerek. Sonda ǵana senderge senip tapsyrylǵan bólimsheler jaýyngerlik daıarlyqta joǵary nátıjelerge qol jetkizip, áskerı tártiptiń qajetti deńgeıin saqtaı alady, – dedi ol.
Jas ofıserlerdiń kásibı qalyptasýy jeke ómirindegi mańyzdy oqıǵalarmen qatar júretini anyq. İs shara barysynda aǵa leıtenant Dmıtrıı Fomenko óziniń súıiktisi Arınaǵa otaý qurýǵa usynys jasady.
Saltanatty shara Qarýly kúshter Ulttyq áskerı-patrıottyq ortalyǵy fılıalynyń shyǵarmashylyq toby daıyndaǵan merekelik konsertpen aıaqtaldy.