80 jastaǵy zeınetker alaıaqqa “nemeresi jasaǵan jol apaty” úshin 2 mıllıon teńge berdi.
Belgili bolǵandaı, Bostandyq aýdanynda turatyn egde adamnyń páterindegi stasıonarlyq telefonǵa qońyraý túsken: “nemere qyzy” apatqa sebepker boldy degen boljammen kómek suraǵan. – Nemerem telefondy advokatqa beretinin, advokat bireýdiń reanımasıada jatqanyn, 5-6 jyl túrmede otyrýdyń ornyna, 6 mıllıon teńge tóleý kerektigin aıtty. Aqshany alyp, aıtqan jerine apardym. Bir jigitke berdim. Olar alaıaq bolyp shyqty, – dedi zeınetker.
«Jedel is-sharalardy júrgizý barysynda “Kıberpol” qyzmetkerleri 20 jastaǵy S.esimdi azamatty ustady. Ol kýrer bolyp jumysqa qabyldanǵanyn aıtyp, istegen isin moıyndady. Atalǵan derek boıynsha sotqa deıingi tergeý bastaldy. Kýrerdiń jeke basy basqa da yqtımal epızodtarǵa qatysy bar-joǵyna tekserilip jatyr», – dedi Almaty qalalyq polısıa departamenti bastyǵynyń orynbasary Dıdar Ahanov.
QR QK-niń 201-babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77-baby 3-bólimi, 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.