Endi júrgizýshi kýáligin alǵash ret alatyn azamattar «Mobıldi HQO» qosymshasy arqyly mamandandyrylǵan halyqqa qyzmet kórsetý ortalyǵyna emtıhan tapsyrýǵa ótinish berip, aldyn ala kezekti brondaı alatyn bolady. Bul janashyldyq ýaqyt únemdeýge ári MHQOdaǵy qyzmetalýshylardyń aǵynyn azaıtýǵa septigin tıgizedi, dep habarlaıdy almaty-akshamy.kz
Ol úshin qoldanýshyǵa «Mobıldi HQO» qosymshasynda «Beıne qyzmetti» tańdaý kerek. Bul servıs qyzmetalýshy alǵashqy aqparatty alý úshin MQKO operatorymen baılanystyrady. Odan keıin klıentke memlekettik bajdy tóleýge nemese aldyn ala tólengen túbirtekti usynýǵa múmkindik beriledi. Tólem jasalǵannan keıin № 073/ý formadaǵy medısınalyq anyqtamanyń, avtomektepti aıaqtaǵany týraly kýáliktiń, qyzmetalýshynyń sýretiniń skanerlengen nusqalaryn jáne talapqa sáıkes qoıylǵan qoltańbany suratatyn bolady. Operatormen sóılesý barysynda atalǵan barlyq qujatty dıalogtyq terezede tirkeý qarastyrylǵan. Aıta ketetin jaıt, azamat ótinishti sátti tapsyrǵannan keıin, MHQO-ǵa aldyn ala kezekti brondaý úshin emtıhan tapsyratyn kún men ýaqyt usynylatyn bolady.
«Buryn emtıhan tapsyratyn azamattar ótinish berý jáne tólem jasaý úshin MHQOǵa barýǵa mindetti bolatyn. Endi bul qyzmetti úıden shyqpaı, onlaın alýǵa bolady. Iaǵnı, beıneqońyraý arqyly ótinish berip jáne kezekti aldyn-ala brondaıdy. Odan keıin klıent MHQOǵa bekitilgen ýaqytta kelip, emtıhanyn tapsyryp kete alady. Bolashaqta ótinish berý fnksıasyn elektrondy portalǵa jáne ekinshi deńgeıli bankterdiń aqparattyq júıelerine engizý josparda bar» - dedi Basqarma Tóraǵasy Súıenish Ábdildın.
Aıta keteıik, servıspen eGov mobile qosymshasynda da qoldanýǵa bolady. Ol úshin basty bettegi «BeıneHQO» batyrmasyn tańdaý qajet.
Almaty qalasynda 2 MHQO-da teorıalyq jáne praktıkalyq emtıhandar kelesi mekenjaıda qabyldanady: № 1 MHQO bólimi – Saıaly sh/a, Aqqaınar k-si, 1; № 1 MHQO bólimi - Jetisý aýdany, Kamel shaǵynaýdany, Aqsýat, 118.