Almaty oblysy, Qarasaı aýdanynan gashısh jetkizip, qala aýmaǵynda olardy satýmen aınalysqan 34 jastaǵy A. esimdi azamat ustaldy.
Almaty polıseıleriniń nazaryna ilikken kúdiktiniń qylmystyq áreket jedel jáne arnaıy is-sharalar barysynda anyqtaldy, dep habarlaıdy Almaty-akshamy.kz.
«Arnaıy is-shara Almatynyń Alataý aýdanynda keshki alty jarymda júrgizildi. Kúdiktiniń Hyundai avtokóligi toqtatyldy. Jeke tintý kezinde, sondaı-aq kúdiktiniń turǵylyqty jeri boıynsha tintý kezinde birneshe polımer baılamdary tabyldy jáne tárkilendi. Olardyń ishinde jasyl tústi ósimdik tektes shańdy zat bar boldy. Sot-hımıalyq saraptamasynyń qorytyndysyna sáıkes, tárkilengen esirtki zaty asa iri kólemdegi gashısh bolyp tabylady. Kúdikti ýaqytsha ustaý ızolátoryna qamaldy», – dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
QR QPK-niń 201-babyna sáıkes, ózge aqparattar tergeý múddesine oraı jarıalaýǵa jatpaıdy. QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady.