Dúnıejúzilik melanoma jáne teri qaterli isigimen kúres kúni aıasynda Almatynyń onkologıalyq ortalyǵynda (Papanın kóshesi, 220, Lıter A) 26 mamyrda saǵat 9.00-den 13.00-ge deıin teri obyryn erte anyqtaý boıynsha Ashyq esik kúni ótedi, dep habarlaıdy almaty-akshamy.kz Almaty qalasy densaýlyq saqtaý basqarmasyna silteme jasap.
Qala turǵyndary men qonaqtary mamandardyń keńesin alyp, alǵashqy teri tekserýinen óte alady.
Almatyda jyl saıyn myńǵa jýyq jańa jaǵdaı anyqtalsa, 3,5 myńǵa jýyq adam teri qaterli isigi dıagnozymen Almaty onkologıalyq ortalyǵynda esepte tur. Onkolog Erlan Ásetillanyń aıtýynsha, qaterli isiktiń bul túri tez jáne agressıvti damýymen erekshelenedi.
Biriktirilgen jáne keshendi emdeýdiń zamanaýı ádisteri osyndaı aýyr syrqatpen tıimdi kúresýge, onkologtyń erte dıagnostıkany anyqtaýyna, aýrýdy bastapqy kezeńde emdeýge úlken múmkindik beretinin atap ótti.
Erlan Ásetilla teri qaterli isigi bastapqy kezeńinde isiktiń paıda bolýy nemese bar meńniń túsi, ólshemi men pishininiń ózgerýi sıaqty belgilerinen kórinetinin aıtty. Sondaı-aq, naýqas túzilim aımaǵynda qyshý, aýyrsyný jáne janý sezimine shaǵymdanýy múmkin.
Onkolog birqatar beıimdi faktorlardy atady: shamadan tys ınsalásıa nemese kún sáýleleriniń belsendi áser etýi, tuqym qýalaýshylyq, belgili bir fototıptegi sepkilder, teri men kózdiń ashyq túsi, denede kóptegen meńniń (nevýs) oryn alýy.
Maman densaýlyǵyn oılaıtyn adamdardy meńderge tıisti nazar aýdarýdy surady. Onyń aıtýynsha, eger adamnyń betinde jáne denesinde jańa nevýs paıda bolsa nemese bar meńderiniń túsi, pishini ózgere bastasa nemese kólemi ulǵaıa bastasa, dárigerdiń keńesi qajet.
Sondaı-aq, uzaq ýaqyt jazylmaıtyn jaralar men qan ketetin nemese ádetten tys suıyqtyq aǵyp ketetin meńder bolsa, olardyń qurylymy ózgerse, qyshyp, aýyrsynǵan nemese uıý oryn alǵan bolsa, oǵan mán berý kerek.