Kreatıvti ındýstrıanyń jarqyn úlgisi bolmaq.
Sońǵy úlgi men erekshe dızaınǵa saı jasaqtalatyn óner murajaıynyń qurylysy qarasha aıynda bastalady. Qala kúni qarsańynda Almaty ákimi Baqytjan Saǵyntaev atalǵan nysannyń jobasymen tanysyp qaıtty, dep habarlaıdy Almaty-akshamy.kz Almaty.tv-ge silteme jasap.
Almaty óner murajaıy. Bul tek kórkemóner týyndylarynyń basyn qosqan oryn emes, jalpy kreatıvti ındýstrıanyń jarqyn úlgisi bolmaq. Sebebi munda otandyq hám jahandyq óner ıeleriniń týyndylarymen qatar, álemdik deńgeıdegi kitaptar da usynylady. Jalpy aýdany 10 myń 400 sharshy metr bolatyn ǵımarat osylaısha jahandyq deńgeıdegi kórmelerdi Almatyda-aq ótkizýge múmkindik bermek. Aıta ketý kerek, monýmentaldy eksponattardy ornatatyn ýaqytsha kórmeler zalynyń aýdany 1000 sharshy metr, al bıiktigi 12 metrdi quraıdy.
Nysannyń aýmaǵyn Almaty óner murajaıyna qalalyq ákimdik arnaıy usynǵan. Jobanyń ıdeıasyna saı, munda «Jasyl Almaty» aksıasynyń negizinde kóshetter otyrǵyzylyp, erekshe úlgidegi saıabaq jasalady. 1,5 kılometrlik radıýsta kógaldandyrylǵan aýmaqtyń joq ekenin eskersek, bul oryn osy shaǵynaýdandaǵy turǵyndar úshin de, jalpy qala azamattary úshin de kórkem jerge aınalady dep kútilip otyr.
«Munda mýzykaǵa, teatrǵa arnalǵan zal jáne balalar men eresekterge arnalǵan oqý bólmeleri, kitaphana, meıramhana, dúken jáne vıdeozaldar bolady», - dedi ónertanýshy Merýert Qalıeva.
Atalǵan murajaı ál-Farabı jáne Nazarbaev dańǵyldarynyń qıylysynda ornalasady. Óner keshenin jobalaý boıynsha qyzmet kórsetetin kompanıa San-Fransısko zamanaýı óner mýzeıi, Bılbaodaǵy Gýggenhaım mýzeıi, Dohadaǵy Katar ıslam óneri murajaıy men Lývr ortalyqtary sekildi jobalarda jumys istegen. Al ınjenerlik sheshimderdi jasaýǵa 40 jyldyq tájirıbesi bar halyqaralyq mamandar tartylǵan.
«Kóptegen qazaqstandyq óner týyndylaryn men shet memleketterde kórip, satyp alyp júrdim. 90-jyldardaǵy kórkemsýretterdi de Parıj, Máskeý tórinde jıi kezdestiresiz. İstiń basy «Osylardyń bári nege óz Otanymyzda turmasqa?» degen oıdan bastalǵan. Al, myna oryndy maǵan qala ákimi usynǵan edi. Jalpy áý bastaǵy ıdeıanyń ózi myqty boldy», - dedi kásipker, mesenat Nurlan Smaǵulov.
Búgingi tanystyrylymǵa turǵyndar da arnaıy kelip, kórshiles aýmaqta boı kóteretin murajaıdyń jobasymen tanysyp qaıtty.
«Myna jer tazalanyp qaldy. Endi mádenıet orny bolsa, tipti jaqsy bolady. Bala-shaǵalarymyzben qydyryp júremiz», – dedi qala turǵyny Nazym Mamanov.
Sońǵy úlgi men erekshe dızaınǵa saı jasaqtalatyn nysannyń qurylysy qarasha aıynda bastalady. Kórkemóner týyndylarynyń basyn qosqan oryn 2023 jyly qoldanýǵa beriledi dep josparlanyp otyr.