Kitapta arhıv pen mýzeıden alynǵan qujattardan derekter keltirilgen
Eńbek ulttyń uly ustazy Ybyraı Altynsarınge arnalǵan. Rýhanı-aǵartýshylyq týyndy «Almatykitap» baspasynyń «Meniń Qazaqstanym» serıasy boıynsha shyǵaryldy. Baspa kelesi jumysyn Shoqan Ýálıhanovqa arnaǵaly otyr, dep habarlaıdy Almaty-akshamy.kz «Habar 24» telearnasyna silteme jasap.
«Ybyraı-dalanyń taza bulaǵy» kitabyn «Almatykitap» baspasy men Qostanaı oblystyq Ybyraı Altynsarın memorıaldyq mýzeıiniń qyzmetkerleri Marǵulan Ospanov pen Saltanat Ótelbaeva birigip jazdy. Jınaqtyń tırajy 9 myń dana. Onyń 5 myńy qazaq tilinde, qalǵany orys tilinde basyldy. Bul kitaptiń ishinde buryn-sońdy jarıalanbaǵan derekter de bar.
«Aıtalyq Altynsarınniń atasy Balqoja bı týraly eshjerde, zertteý áli de kemshin tartyp jatqan edi. Sol Balqoja bıdiń ómir deregin jáne de sýretin izdestirip zerttep osy kitapqa alǵash ret minekı sol Balqoja bıdiń sýretin jarıalap otyrmyz», - deıdi kitap avtory Marǵulan Ospanov.
Baspagerler bul kitap árbir muǵalimniń qolynda bolýy tıis, dep sanaıdy. Onda Altynsarınniń tutas ómiri men pedagogıkalyq eńbegi keńinen baıandalady. Oǵan qosa arhıv pen mýzeıden alynǵan qujattardan derekter keltirildi.
«Kitapty sol salany zerttep júrgen mamandar baspaǵa daıyndaý kerek dep sanaımyn. Biz buǵan deıin Abaı týraly eńbekti onyń Semeıdegi memorıaldyq mýzeıimen birigip shyǵaǵarǵan edik. Mine endi Altynsarınge qatysty kitapty usynyp otyrmyz. Kelesi jumysymyzdy Shoqan Ýálıhanovqa arnap jatyrmyz»,- deıdi «Almatykitap» baspasynyń prezıdenti Gaýhar Saımasaeva.