Qala ákiminiń orynbasary Erjan Babaqumarovtyń tóraǵalyǵymen otyrys ótip, monıtorıń júrgizý algorıtmi bekitildi.
Almatyda monıtorıńtik toptar vaksına almaǵan qyzmetkerlerdi tekserýdi bastady. Aýdandyq ákimdik ókilderi jáne tártip saqshylarynan quralǵan brıgadalar aldymen ujym sany 50-den joǵary mekemelerdi baqylaýǵa aldy, dep habarlaıdy Almaty-akshamy.kz Almaty.tv-ge silteme jasap.
Ekpe alýǵa mindetti qyzmetkerler úshin vaksınanyń qos komponentin salǵyzý merzimi 1 qyrkúıekte aıaqtaldy. Osyǵan oraı Almatyda qazir 40 mobıldi top jumyldyrylǵan. Qala ákiminiń orynbasary Erjan Babaqumarovtyń tóraǵalyǵymen otyrys ótip, monıtorıń júrgizý algorıtmi bekitildi. Shahardaǵy koronavırýsqa qarsy ujymdyq ımýnıteti tómen kásiporyndardyń tizimi daıyndalyp jatyr.
Aldymen ekpe alǵan qyzmetkerlerdiń tizimi jáne olardyń vaksınalaý qujattary tekseriledi. Al, jumysshynyń densaýlyǵyna baılanysty vaksınaǵa qarsy kórsetilimi bolsa, ózimen birge medısınalyq anyqtamasy bolýy qajet. Sondaı-aq, jumys ornyndaǵy karantın talaptarynyń saqtalýy da eskeriledi.
Onymen qosa, júkti áıelderden de vaksınalaý qujaty talap etilmeıdi. Al, ekpe alýdan bas tarqan qyzmetkerler onlaın formatta jumys isteýi kerek. Eger dástúrli rejımde qyzmet etkisi kelse, apta saıyn nátıjesi teris PTR testin tapsyryp otyrýy tıis.
Monıtorıńtik top qyzmetkerdiń vaksına almaǵanyn anyqtalsa, jumys berýshi tek eskertýmen qutylýy múmkin. Al zańbuzýshylyq ekinshi ret qaıtalansa, mekeme basshysy ákimshilik jazaǵa tartylady.
«Kásipkerlerlik nysandardy tekserýdi bastadyq. Tekserý barysynda búkil qyzymetkerlerdiń tizimi, onyń ishinde vaksına alǵandary, dárigerdiń anyqtamasyna sáıkes bosatylǵandar, búkil tizim boıynsha tekserdik. Bul tekserý barysynda eshqandaı zańbuzýshylyqtar anyqtalǵan joq», – dedi Áýezov aýdany Kásipkerlikti jáne ónerkásipti damytý bóliminiń bas mamany Zákirjan Altynqojaev.
Búginde megapolıs ekpe alǵan turǵyndar sany boıynsha respýblıkada kósh bastap tur. Munda osy ýaqytqa deıin 903 myńnan asa adam kovıdtik preparattyń birinshi komponentin saldyrǵan. Al 725 myńdaı almatylyq tolyq ımýnıtet qalyptastyrdy.