Almaty qalasynda Qazaqstan halqy Assambleıasy Aqsaqaldar keńesiniń «Adal azamat – ult kelbeti» atty V Respýblıkalyq forýmy ótti, dep habarlaıdy aqshamnews.kz
İs-sharaǵa QHA Tóraǵasynyń orynbasary Marat Ázilhanov, Qazaqstan Respýblıkasy Parlamenti Májilisiniń depýtaty Sergeı Ponomarev, Almaty qalasy ákiminiń orynbasary Azamat Qaldybekov, etnomádenı birlestikterdiń ókilderi, QHA qoǵamdyq qurylymdarynyń músheleri jáne óńirlik aqsaqaldar keńesteriniń tóraǵalary qatysty.
Forým aıasynda QHA XXXIV sesıasynda Memleket basshysy bergen tapsyrmalardy oryndaý máseleleri, Assambleıanyń 30 jyldyq qyzmetiniń qorytyndylary talqylandy. Sondaı-aq etnosaralyq kelisimdi nyǵaıtýda, jastarǵa dástúrli qundylyqtardy dáripteýde Aqsaqaldardyń róli sóz etildi.
Plenarlyq sesıada «Adal azamat» jobasyn júzege asyrý, etnomedıasıany damytýǵa, Analar keńesterimen ózara baılanys ornatý, sondaı-aq jastardy adamgershilikke jáne patrıotızmge tárbıeleý sekildi máselelerge erekshe nazar aýdaryldy.