Kardıologıa jáne ishki aýrýlar ǵylymı-zertteý ınstıtýtynda Qytaı Halyq Respýblıkasynyń ıntervensıalyq kardıologıa salasyndaǵy tanymal álemdik sarapshylary – Sychýan ýnıversıtetiniń Batys Qytaı aýrýhanasynyń kardıologıa bóliminiń dırektory profesor Mao Chenniń jáne aýrýhananyń bas dárigeri, týa bitken júrek aqaýlaryn ıntervensıalyq emdeý jónindegi jetekshisi Iýán Fenniń qatysýymen qolqa stenozyn emdeýdiń ozyq az ınvazıvti tehnologıasy – qolqa qaqpaqpashasyn transkateterlik ımplantasıalaý (TAVI) boıynsha sheberlik sabaǵy ótti.
TAVI – aýyr qolqa stenozy jáne joǵary operasıalyq qaýpi bar naýqastar úshin ashyq júrek operasıasyna zamanaýı balama. Bul ádis bıologıalyq klapandy keýde qýysyn ashpaı-aq femoraldy arterıa arqyly jetkizýge múmkindik beredi, aýrýhanaǵa jatqyzý ýaqytyn qysqartady jáne asqynýlardyń sanyn azaıtady.
Sheberlik sabaǵy aıasynda Qazaqstanda alǵash ret jetekshi qytaı óndirýshisiniń sońǵy býyn ınovasıalyq ózi ashylatyn klapannyń alǵashqy ımplantasıasy jasaldy. Kardıologıa jáne ishki aýrýlar ǴZI rentgenoperblok meńgerýshisi Alekseı Kolesnıkovtyń aıtýynsha, bul júıe biregeı klınıkalyq múmkindikterdi usynady: joǵary sapaly perıkardıaldy tinnen jasalǵan ózdiginen ashylatyn klapan pasıenttiń anatomıalyq erekshelikterine ońaı beıimdeledi, al ony qaıta ornalastyrý jáne alý múmkindigi ornatýdyń dáldigin qamtamasyz etedi jáne táýekelderdi azaıtady. Tehnologıa joǵary gemodınamıkalyq tıimdilikpen sıpattalady.
Eki kún ishinde 7 naýqasqa operasıa jasaldy. Bir mysal retinde atap óteıik: 74 jastaǵy naýqasta klınıkaǵa túsken kezde bas aınalý, bas aýrýy, aıaǵy tońý, jalpy álsizdik, fızıkalyq kúsh túskende, 100-150 metr qashyqtyqta júrse entigý sıaqty shaǵymdary boldy. Negizgi dıagnozy: júre paıda bolǵan júrek aqaýy, qolqa qaqpaqshasynyń aıqyn stenozy, sozylmaly júrek qyzmetiniń jetkiliksizdigi. Qosymsha dıagnozy: júrektiń ıshemıalyq aýrýy, arterıalyq gıpertonıa, 2 tıpti qant dıabeti. Operasıadan keıin naýqas ózin óte jaqsy sezinedi. Jalpy, barlyq operasıalar sátti ótti.
«Bul sheberlik klasy Qazaqstanda emdeýdiń álemdik standarttaryn engizýge, otandyq mamandardyń quzyretterin keńeıtýge jáne júrek aýrýlary bar naýqastarǵa kómek kórsetýdiń ozyq ádisteriniń qoljetimdiligin arttyrýǵa yqpal ete otyryp, joǵary tehnologıalyq kardıohırýrgıany damytýdaǵy mańyzdy kezeń boldy», – deıdi ınstıtýttyń Basqarma tóraǵasy Marat Pashımov.