Memlekettik rámizder kúnine oraı Aqtaýda dástúrge aınalǵan patrıottar forýmy ótti, dep habarlaıdy aqshamnews.kz
Aqtaý qalalyq ishki saıasat jáne tilderdi damytý bóliminiń tapsyrysymen ótken forým «Eńbek – yrystyń qazyǵy» degen ataýmen uıymdastyryldy, dep habarlaıdy Qoǵamdyq komýnıkasıa ortalyǵy qala ákimdiginiń baspasóz qyzmetine silteme jasap. Forýmǵa qalalyq qoǵamdyq keńes ókilderi, analar jáne aqsaqaldar keńesi músheleri, memlekettik qyzmetkerler, bilim, quqyq qorǵaý, densaýlyq saqtaý salalarynyń ókilderi men jastar qatysty.
Sharanyń basty maqsaty – jastarǵa patrıottyq tárbıe berý, eńbekqorlyqty nasıhattaý jáne elge adal qyzmet etip júrgen qarapaıym azamattardyń eńbegin dáripteý deıdi shara uıymdastyrýshysy.
- Memleket basshysy 2025 jyldy – «Jumysshy mamandyqtar jyly» dep jarıalady. Osy oraıda búgingi forýmǵa tek sportshylar men óner adamdary ǵana emes, kún saıyn qalanyń tynys-tirshiligine úles qosyp júrgen qarapaıym jumysshy mamandar da qatysyp otyr. Úılerimizdiń jaryǵy sónbeı, jylýy úzilmeı turýy – sol kisilerdiń eren eńbeginiń nátıjesi. Olar – shynaıy patrıottar. Biz olardyń úlgili isterin jastarǵa ónege retinde kórsetýimiz kerek, – dedi «Mańǵystaý jergilikti bastama ortalyǵy» qoǵamdyq qorynyń basshysy Jaqsygúl Mahanbetova.
Shara sońynda qalanyń úzdik patrıot jastary marapattaldy. Sondaı-aq qatysýshylar «Atameken» áni aıasynda kók týdy jelbiretip belsendilik tanytty.