Uly Otan soǵysynyń ardageri, KSRO İİM-niń eńbek sińirgen qyzmetkeri, QR İİM-niń Qurmetti ardageri, mılısıa polkovnıgi Esenǵazıev Oranǵalı Esenǵazyulyna otbasymen birge turǵan úıdiń qasbetine eskertkish taqta ornatyldy.
Saltanatty jıynǵa Almaty qalalyq PD-nyń basshylyǵy, jeke quramy jáne İİO-nyń ardagerleri qatysty, dep habarlaıdy Almaty-akshamy.kz Polisia.kz-ke silteme jasap.
Aty ańyzǵa aınalǵan azamat týraly búginde QR İİM qurmetti ardagerleri, Oranǵalı Esenǵazıevtiń áriptesteri óz estelikterimen bólisti. Oranǵalı Esenǵazıev 1922 jyly Batys Qazaqstan oblysy, Qaratóbe aýdany, Batbaqul aýylynda dúnıege kelgen. Ol balalar úıinde tárbıelendi. Jeti jyldyq mektepti bitirgennen keıin Ońtústik Qazaqstan oblysyndaǵy aýylsharýashylyq tehnıkýmyna oqýǵa túsken.
1941-1946 jyldary jumysshy-sharýa qyzyl armıasy qatarynda bolyp, batareıa komandıri dárejesine deıin kóterildi. UOS ardageri quqyq qorǵaý organdarynda 1947 jyldan beri qyzmet etti. Soǵys aıaqtalǵannan keıin eldegi qylmystyq jaǵdaı nasharlady, bandıtızm men qylmystyq quqyq buzýshylyqtardyń ósýi artty. Osyǵan oraı, elimizde maıdangerlerdi polısıa jumysyna belsendi tartý qolǵa alyndy.
Esenǵazıev bandıtızmge qarsy kúres bólimine (BQK) jedel ýákildiń kómekshisi bolyp qabyldanyp, qajetti jedel daǵdylardy meńgerdi. Kóp uzamaı arnaıy bilim alý úshin Almatydaǵy KSRO İİM-niń ofıserler mektebine oqýǵa jiberildi. Oqýdy bitirgennen keıin ol negizgi quram kýrsynyń meńgerýshisi bolyp qaldy. Munda ol kýrsanttardy ózine júktelgen mindetti oryndaýǵa jumyldyra alatyn, talapty komandır ekenin kórsetti. Kishi komandırlermen jumys isteýge de jetkilikti kóńil bóldi. 1978 jyly mılısıa polkovnıgi shenimen zeınetkerlikke shyqty. Uly Otan soǵysynyń ardageri 2016 jyly dúnıeden ótti.
Oranǵalı Esenǵazıev jaıly estelikterdi İİO-nyń ardagerleri men polısıa qyzmetkerleriniń jas býyny eshqashan umytpaıdy. Oranǵalı Esenǵazıev áskerı jáne eńbek ordenderimen marapattalǵan: Birinshi jáne ekinshi dárejeli Otan soǵysy, “Qyzyl Juldyz”, “Qurmet”, “Bizdiń Jeńis úshin” (RF), 50-den astam medal jáne tósbelgi, onyń ishinde jaýyngerlik jáne eńbektegi erligi úshin de marapattalǵan. Sondaı-aq QR İİM men KSRO İİM, Almaty qalasy ákimdiginiń, Máskeý qalasy Úkimetiniń, Ortalyq jáne Almaty qalalyq ardagerler keńesiniń Qurmet gramotalarymen birneshe ret marapattalǵan.