Jandarbek Bekshın barlyq indetter tolqyn tárizdi aǵymmen sıpattalatynyn aıtty.
Almaty qalasynyń bas sanıtarlyq dárigeri Jandarbek Bekshın megapolıste koronavırýs juqtyrǵandardyń sany nelikten tez óskenin túsindirdi, dep habarlaıdy Almaty-akshamy.kz
«Epıdemıologıalyq ahýaldyń nasharlaýynyń basty sebebi vırýstyń jańa shtamdarynyń paıda bolýynan. Derttiń kúrt ósýin koronavırýstyń "tórtinshi tolqyny" dep ataýǵa bolady. Biz dertke qarsy tura alamyz, qazirdiń ózinde 3 500 tósek-oryn daıyndaldy. Qazirgi kezde naýqastarǵa arnalǵan 1 760 tósek-oryn bar. Olardyń sanyn 35%-ǵa arttyramyz», – dedi Jandarbek Bekshın.
Almatynyń bas sanıtarlyq dárigeri úndi shtamyn juqtyrǵan áıel men onyń balasynyń jaǵdaıy týraly da aıtty. Áıeldiń aıtýynsha, iri qurylys dúkenderine barǵan kórinedi, ınfeksıany sol jerde juqtyrýy múmkin.
«Ana men balanyń jaǵdaıy qalypty. Olar aýrýhanadan shyǵaryldy jáne dárigerlerdiń baqylaýynda», – dedi jýrnalıserge Jandarbek Bekshın.
Almaty epıdemıologtary koronavırýs ınfeksıasyn juqtyrýdyń eń yqtımal oryndaryn anyqtady. Mysaly, otbasylyq sharalar, toılar, mereıtoılar, eske alý keshteri 1,7%-dy quraıdy. Sondaı-aq túngi klýbtarǵa kelýshiler, karaoke oryndary 0,2%-ǵa óskenin aıtty. Al ASHYQ jobasyna qatysatyn nysandarda ınfeksıa jaǵdaılary tirkelmegen.
Bul rette otbasylarda juqtyrýdyń úles salmaǵy – 25%, saýda nysandarynda – 23%, qoǵamdyq kólikte qatynaý – 16,7%, buqaralyq is-sharalarǵa qatysý kezinde – 6% quraıdy.
Sanıtarlyq dárigerler men epıdemıologtar «delta» shtamynyń balalar men jastarǵa naqty áserin aıtty. Ótken aptada 14 jasqa deıingi balalar arasynda aýrý 2,3%-ǵa ósti.
Jandarbek Bekshın megapolıs turǵyndary men qonaqtaryna demalys kúnderi buqaralyq is-sharalarǵa, saltanattarǵa, klýbtarǵa barýdan bas tartýǵa, sanıtarlyq normalardy saqtaýǵa shaqyrdy.