Dárigerler qala turǵyndaryn karantındik sharalardy saqtaýǵa shaqyrdy.
2 shildede Óńirlik komýnıkasıalar qyzmetiniń baspasóz konferensıasy barysynda Almaty qalasy sanıtarlyq-epıdemıologıalyq baqylaý departamentiniń basshysy Jandarbek Bekshın qalada koronavırýstyń jańa shtamdarynyń aınalymy týraly aıtty, dep habarlaıdy Almaty-akshamy.kz.
Jandarbek Bekshınniń aıtýynsha, Almatyda epıdemıologıalyq ahýal jáne ınfeksıanyń taralýyna jol bermeý karantındik sharalardy saqtaýǵa jáne megapolıs turǵyndarynyń vaksınalaný qarqynyna tikeleı baılanysty.
Almatynyń bas sanıtarlyq dárigeri dert juqtyrǵandar sanynyń kúrt ósýine baılanysty epıdemıologtardyń 18 maýsymnan bastap Almatyda mýtasıalanǵan shtamdarǵa zertteý júrgize bastaǵanyn aıtty.
Bas sanıtarlyq dáriger qalada buryn epıdemıologıalyq ahýaldyń kúrdelenýi brıtandyq «álfa» shtamyna qatysty bolǵanyn, endi boljam boıynsha Nur-Sultan qalasy men Reseıden ákelingen «delta» shtamynan órshı túskenin aıtty.
Jandarbek Bekshın 30 maýsymda kezekti zertteýlerdiń nátıjesi alynǵanyn aıtty.
«46 synamanyń 36-da «delta» shtammy, 8-inde «álfa» shtamy jáne ekeýinde ashylmaǵan mýtasıa anyqtaldy. Almatydaǵy epıdemıologıalyq ahýal koronavırýs dertine shaldyqqandardy zertteý barysynda anyqtalǵan 78% úlgisinde COVID-19 jańa «delta» shtamyna baılanysty bolýda», – dedi sanıtarlyq-epıdemıologıalyq baqylaý departamentiniń basshysy.
Jandarbek Bekshın qala turǵyndary men qonaqtaryn halyq kóp jınalatyn oryndarǵa barmaýǵa, áleýmettik qashyqtyq pen betperde rejımin saqtaýǵa shaqyrdy. Almatynyń bas sanıtarlyq dárigeri koronavırýstyń jańa shtamynyń tez taralatynyn ári qala turǵyndarynyń densaýlyǵy úshin óte qaýipti ekenin, sondyqtan vaksınalaný qajettigin eske saldy.