Bul suraqqa qalanyń bas sanıtary Jandarbek Bekshın jaýap berdi.
Osy jaıynda Almaty qalasy Óńirlik komýnıkasıalar qyzmetiniń alańynda ótken «Aǵymdaǵy epıdemıologıalyq jaǵdaı jáne COVID-19-dyń taralýyn aldyn alý sharalary» taqyrybynda onlaın baspasóz-konferensıasynda bas sanıtar málim etti, dep habarlaıdy Almaty-akshamy.kz.
«Keshe, 22 maýsym kúni, keshke «delta» shtammynyń bolý múmkindigi anyqtaldy. Biz ony búgin taǵy bir ret rastadyq. Mýtasıalanǵan delta shtammynyń shynymen de aınalymda bar ekeni belgili boldy», - dedi ol.
Sonymen qatar, ol atalǵan shtamdy kim juqtyrǵanyn atap ótti.
«Ol - 1984 jyly týǵan K. esimdi azamatsha. Úı sharýasyndaǵy áıel, esh jerde jumys istemeıdi. Onyń kúıeýi shetelde issaparda júr. Aıta ketý kerek, onyń joldasy aqpan aıynda koronavırýspen aýyrǵan. Al naýqastyń ózi qazir aýrýhanada jatyr. Onymen baılanys jasaǵan jeti adam oqshaýlandy. Epıdemıologıalyq tekserý júrgizilip jatyr. Ázirge onyń bul shtammdy naqty qaı jerde juqtyrǵany belgisiz. Ol kisi birneshe nysanda bolǵan. Ol jerler baqylaýǵa alyndy», - dedi Jandarbek Bekshın.