Qazaqstan polısıasy kúni: İshki ister mınıstri Erlan Turǵymbaev İİO qyzmetkerleri men ardagerlerin quttyqtady
Búgin qazaqstandyq tártip saqshylary ózderiniń kásibı merekeleri – Polısıa kúnin atap ótýde, – dep habarlaıdy Almaty-akshamy.kz Polisia.kz caıtyndaǵy habarǵa silteme jasap.
1992 jyly 23 maýsymda Qazaqstan Respýblıkasynyń Joǵarǵy Keńesi “Qazaqstan Respýblıkasynyń ishki ister organdary týraly” zańyn qabyldady. Onda qazaqstandyq polısıanyń mindetteri men fýnksıalary aıqyndaldy. 2007 jyly Qazaqstannyń Tuńǵysh Prezıdenti Nursultan Nazarbaevtyń Jarlyǵymen 23 maýsym - Polısıa kúni bolyp bekitildi. İshki ister mınıstri Erlan Turǵymbaev elimizdiń barlyq polısıa qyzmetkerlerin kásibı merekesimen quttyqtady.
“Qurmetti ardagerler, áriptester! Barshańyzdy Qazaqstan polısıasy kúnimen shyn júrekten quttyqtaımyn. Táýelsizdik alǵaly ishki ister organdarynyń qyzmetkerleri elimizde qoǵamdyq tártipti qamtamasyz etip, azamattardyń quqyqtaryn saqtaý jolynda qyzmet etýde. Memleket basshysy ishki ister organdarynyń jumysyna erekshe kóńil bólip otyr. Halyqtyń polısıaǵa senimin arttyrý úshin, servıstik modelge kóshý jalǵasýda. Vedimistik bilim berý júıesine reforma júrgizildi. Qyzmetkerlerdiń áleýmettik jáne materıaldyq jaǵdaıy jaqsardy. Jalaqy kóterilip, turǵyn úıge ótemaqy alatyn qyzmetkerler sany ósti. Bul polısıa qyzmetkerlerinen joǵary jaýapkershilikti jáne qyzmettik mindetterin adal atqarýdy talap etedi. Tótenshe jaǵdaı men karantın kezinde qyzmetkerler tek ózderiniń tikeleı mindetin atqaryp qana qoımaı, adamdardyń ómiri men densaýlyǵyn qorǵaý úshin dárigerlermen birge aldyńǵy shepte júrdi. Eldegi qaýipsizdikti qamtamasyz etýge bar kúshin salǵan qyzmetkerlerdiń eńbegi joǵary baǵalandy. Táýelsizdik alǵannan bastap, 1,5 myń qyzmetker memlekettik nagradamen marapattaldy.
Ókinishke oraı, Táýelsizdik jyldary qyzmettik boryshyn oryndaý kezinde 802 qyzmetker qaza taýyp, 2650 adam jaraqat aldy. Biz antqa adal bolǵan áriptesterdi eshqashan umytpaımyz. Batyrlarymyzdyń rýhyna máńgilik taǵzym!
Ardagerlerimizdiń de polısıanyń damýyna qosqan eńbegi erekshe. Jas qyzmetkerlerdi tárbıelep, jańa formattaǵy polısıanyń beınesin qalyptastyrýǵa qosqan úlesi úshin úlken alǵys bildiremin. Qurmetti ardagerler jáne áriptester! Búgingi kásibı mereke kúni sizderdiń otbasylaryńyzǵa zor densaýlyq, baqyt pen baılyq, Otanymyz – Qazaqstan Respýblıkasyn órkendetý jolyndaǵy qyzmetterińizge tabys tileımin!” – dedi İshki ister mınıstri Erlan Turǵymbaev quttyqtaý sózinde.