Almaty qalasyndaǵy 28 gvardıashy-panfılovshylar atyndaǵy saıabaqta ornalasqan Dańq memorıaly Uly Jeńistiń 80 jyldyǵyna oraı aýqymdy jańartý jumystarynan ótýde. Bul týraly Aqshamnews.kz saıty habarlaıdy. Eskertkish kesheni alǵash ret 1975 jyly 8 mamyrda, Jeńistiń 30 jyldyǵyna oraı ashylǵan bolatyn. Sodan beri bul nysan qalanyń eń mańyzdy tarıhı-rýhanı oryndarynyń birine aınaldy.
50 jyldyq eskertkish – kúrdeli jóndeýden ótýde
Ýaqyt óte kele memorıaldyń granıt taqtalary, brýschatkasy jáne beton negizi aıtarlyqtaı tozǵan. Jóndeý jumystary kezinde plıtalar alynyp, tolyqtaı jańadan beton quıylyp, granıt betteri qaıta óńdelip, jyltyratylǵan.
«Alǵashynda bul jumysty jeńil bolady dep oıladyq. Biraq plıtalar kóterilgen kezde betonnyń qumǵa aınalǵanyn kórdik. Sondyqtan bárin tolyq jańalaýǵa týra keldi», – deıdi Mýzeı boevoı slavy dırektory ári Keńes Odaǵynyń Batyry Ivan Panfılovtyń nemeresi Alýa Baıkadamova.
Tarıhı kelbet tolyq saqtaldy
Jańartý jumystary kezinde Dańq memorıalynyń tarıhı ári sáýlettik kelbeti saqtalyp, burynǵy beınesi buzylǵan joq. Alýa Baıkadamova bul orynnyń tarıhı mańyzyn erekshe atap ótti:
«Bul jerge jyl saıyn myńdaǵan adamdar keledi. Qýantatyny – jastardyń da qatary artyp keledi. Olar óz ata-babalarynyń sýretterin ustap kelip, taǵzym etedi», – dedi ol.
Urpaqqa amanat bolar tarıhı nysan
Saıası ǵylymdar doktory Jomart Sımtıkovtyń pikirinshe, Dańq memorıaly – Keńes dáýirinde jasalǵan trıptıh úlgisindegi sırek sáýlet týyndysy. Onyń aıtýynsha, mundaı tarıhı eskertkishter urpaqtan urpaqqa patrıottyq rýh pen el tarıhyn jetkizýge sep bolmaq:
«Almatylyqtar úshin bul eskertkishtiń tarıhı kelbeti ózgermeı saqtalǵany óte mańyzdy. Mundaı oryndar – ulttyń jady», – deıdi sarapshy.
Mýzeı de jańartylýda
Saıabaq aýmaǵyndaǵy Jaýyngerlik dańq mýzeıinde de jóndeý jumystary júrgizilip jatyr. Bul jerde kelýshiler Panfılov dıvızıasynyń erligi, qazaqstandyq jaýyngerlerdiń maıdandaǵy janqıarlyq kúresi týraly derektermen tanysa alady. Arhıvtik qujattar, fotosýretter, jeke zattar – barlyǵy bolashaq urpaqqa el shejiresin jetkizýge qyzmet etedi. Mýzeıdegi jóndeý jumystary jaqyn kúnderi aıaqtalmaq.
Dańq memorıaly – Almaty turǵyndary men qonaqtary úshin Uly Otan soǵysynyń qaharmandaryna degen qurmettiń sımvoly. 80 jyldyq mereıtoı qarsańynda eskertkishtiń jańǵyrýy – tarıhty umytpaý, ótkenge taǵzym etip, bolashaq urpaqqa úlgi bolarlyq is.
