11 qazan kúni Almatyda otandyq pedagogıka ǵylymynyń damýyna súbeli úles qosqan kórnekti ǵalym, ulaǵatty ustaz Kúlásh Quantaıqyzynyń qurmetine oqý ǵımaraty berilip, dárisqananyń ashylý saltanaty ótti.
Bul týraly sqabarlady.
Kúlásh Qunantaeva – Qazaqstan áıelderiniń ishinen shyqqan tuńǵysh pedagogıka ǵylymdarynyń doktory, akademık. İs-sharada profesordyń qurmetine oqý ǵımaraty berilip, «Qazaqstandaǵy bilim salasynda áıelderdiń róli» taqyrybynda konferensıa ótkizildi. Konferensıa aıasynda ǵalymnyń ómiri men ǵylymı qyzmeti jóninde baıandama jasaldy.
«Kúlásh Qunantaıqyzy – meniń ǵylymı jetekshim. Uzaq ýaqyt boıy janynda júrip, bilimmen sýsyndadym. Elge belgili tulǵanyń qasynda júrip, ǵylymnyń qyr-syryn meńgerý – men úshin úlken dáreje. Ustazymnyń adamı bolmysyna tántimin. Bizdi tek maman retinde ǵana emes, tulǵa retinde qalyptasýymyzǵa da óziniń úlken úlesin tıgizdi. Kúlásh Qunantaıqyzy salǵan izben men de búgin shákirt tárbıeleýdemin. Kúlásh Qunantaeva – meniń ǵylymdaǵy anam. Jetken jetistikterim ustazymnyń eńbeginiń jemisi dep bilemin. Eńbegin elep, esimin ulyqtap jatqan Ýnıversıtet basshylyǵyna aıtar alǵysym sheksiz», – dedi pedagogıka ǵylymdarynyń doktory, L.N.Gýmılev atyndaǵy Eýrazıa ulttyq ýnıversıteti profesory Seıitqazy Perızat Baıteshqyzy.
Sondaı-aq is-shara barysynda Qazaqstan Respýblıkasynyń Ulttyq ǵylym akademıasynyń jáne QR Pedagogıka ǵylym akademıasynyń qurmetti akademıginiń jetistikteri, fotosýretteri, qujattary men ǵylymı jumystary usynylatyn kórme uıymdastyryldy. Ýnıversıtet rektory Gúlmıra Qanaı Kúlásh Qunantaıqyzynyń qazaq áıelderiniń joǵary bilim alýy jolynda sińirgen eńbegi zor ekenin atap ótti.
«Kúlásh Qunantaıqyzynyń qazaq áıelderiniń joǵary bilim alýy jolynda sińirgen eńbegi zor. Ol kisiniń tikeleı yqpalymen áıelder biliminiń damýy jáne Qazaqstanda bilim berýdi damytý týraly 400-den asa ǵylymı eńbegi jaryq kórdi. Onyń ishindegi oqý quraldary men oqýlyqtar jáne monografıalar bar. Kúlásh Qunantaevanyń jetekshiligimen ǵylym kandıdattary men doktorlar daıyndaldy. Qazirgi kúnde de «Qunantaevanyń ǵylymı mektebi» sabaqtastyǵy saqtalǵan», – dedi rektor.
Shara sońynda jekemenshik medısınalyq ortalyq atynan 4 stýdentke 3 mıllıon teńge kóleminde Kúlásh Qunantaıqyzy atyndaǵy grant berildi.