Temirbek Júrgenov atyndaǵy Qazaq ulttyq óner akademıasy Respýblıka kúni qarsańynda Á.Kasteev atyndaǵy Memlekettik óner mýzeıinde «Tulǵalardyń izimen» dep atalatyn kórme ashty.
Ekspozısıada akademıanyń «Keskindeme, músin jáne dızaın» fakúlteti stýdentteriniń úzdik dıplomdyq, oqý jáne shyǵarmashylyq jumystary bar.
Atalmysh óner akademıasy – ónerdiń túrli salalarynda mamandar daıarlaıtyn Ortalyq Azıa men Qazaqstannyń jetekshi joǵary oqý oryndarynyń biri. Búgingi kúni oqý ordasy respýblıka sýretshileri úshin bedeldi mektep retinde tanymal. Ótkenge sál sheginis jasap keter bolsaq, beıneleý óneri fakúltetin qalyptastyrýdyń bastaýynda elimizdiń ulttyq kórkem keskindeme, músin jáne grafıka mektebiniń negizin qalaǵan Q.Teljanov, M.Kenbaev, H.Naýryzbaev, K.Shaıahmetov, E.Sergebaev, D.Sýleev, B.Túlkıev, D.Shoqparov sıaqty kórnekti sýretshiler turdy.
— Kórmede 50-den astam shyǵarma usynylyp otyr. Olardyń kópshiligi túlekterdiń dıplomdyq jumystarynan turady, sonymen qatar ártúrli kýrs stýdentteriniń oqý jumystary kiredi. Ónersúıer kórermenge monýmentaldy jáne stanoktyq grafıka, keskindeme, baspa grafıkasy, sándik-qoldanbaly ónerdiń ár túrleri: gobelen, batık, shı, keskindeme, sondaı-aq zergerlik óner sıaqty beıneleý óneriniń túrleri usynyldy, — dedi T.Júrgenov atyndaǵy Qazaq ulttyq óner akademıasynyń rektory Arman Júdebaev.
Ekspozısıada ejelgi qazaq mıfologıasynan, halyq ertegileri men ańyzdarynan, sondaı-aq dala halyqtarynyń tarıhynan alynǵan beınelerge baılanysty birqatar týyndy jarqyrap tur. Á.Omarquldyń «Babalar sózi», S.Muhtarqyzynyń «Jeztyrnaq» sıaqty shyǵarmalarynda sýretshiler halyq aýyz shyǵarmashylyǵynyń murasyna nazar aýdara otyryp, ótkenniń beınelerin qazirgi zamannyń ıntepretasıasynda beıneleıdi. Bul jumystarǵa qazirgi kúni tanymal japon anımasıasy áser etti, ol óziniń jarqyn vızýaldy jáne kınematografıalyq áserlerimen erekshelenedi. Al M.Jıgalenoktyń «Sheberhana» kompozısıasy oqý úrdisiniń bir sátin beıneleıdi.
Egemendi elimizdi kórkeıtip, bezendirýde qosqan úlesiniń bastaýyn osy beıneleý óneri mektebiniń týyndylary aıqyndamaq. Bul kórme keskindeme, músin jáne dızaın fakúltetiniń ár jyldardaǵy qyzmeti týraly esep berýdiń bir túri. Fakúltet dekany Baýyrjan Baıdildanyń oqý úrdisin jetildirýde, beıneleý óneri salasyna jas mamandardy daıarlaý ádistemesin ázirleýde qosqan úlesi zor deıdi kórmeni uıymdastyrýshylar.
— Men búgingi kórme úshin, zamandastarymnyń úzdik jumystary úshin qýanyshtymyn. Barlyq kartınadan ulttyq bolmysymyz menmundalap tur. Jastar qazaqy qundylyqtarymyzdy zamanaýı jańasha kózqaraspen, ashyq boıaýlarmen jetkize bilgen. Atalarym molda bolǵan kisiler, sondyqtan da tabıǵatyma qazaqy qundylyqtar jaqyn. Portret janrynda talaptanyp, osy baǵytta jumys istep júrmin. Keıbir jandardyń jaqsy adam ekeni júzinen kórinip turady ǵoı, portretterimde olardyń sol jaqsy qasıetteri esh boıamasyz, kórermen júregine birden jol taýyp, kórinip tursa eken deımin. Ázirge ustazdardan úırenerimiz kóp. Al júregi ónerge jaqyn sezimtal zamandastaryma sáttilik tileımin, — deıdi kórme meımany, T.Júrgenov atyndaǵy Qazaq ulttyq óner akademıasy kolejiniń İİ kýrs stýdenti Toǵjan Eleýsiz.
«Tulǵalardyń izimen» kórmesi osy aıdyń sońyna deıin jalǵasady.